Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 122 Hüküm no: 111 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın tasarrufundaki vakıf tarlalar ile bostanı ve çayırı Durmuş Beşe’ye devrettiği Medîne-i Hazret-i Eyyûb’de Takyecibaşı mahallesinde sâkine fahrü’l-muhadderât Âişe bt. Mustafa nâm hâtun tarafından tasdîk-i câ’i’z-zikri ikrâra vekîl olup merkūmenin zâtını ma‘rifet-i şer‘iyye ile ârifân olan Ahmed Çelebi b. Mehmed ve Ali b. Mehmed şehâdetleriyle şer‘an vekâleti sâbite olan Mahmud Beşe b. Hüseyin nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâbi’l-müstetâb Durmuş Beşe b. Ebî Tâlib nâm kimesne mahzarında bi’l-vekâle ikrâr ve i‘tirâf edip merhûm eş-Şeyh Hasan Efendi Evkāfı arâzisinde olup vilâyet-i Rumeli’nde Burgos kazâsına tâbi‘ Turgud Bey karyesinde ve Taşlı nâm karyede vâki‘ her birinin hudûdu beynimizde ma‘lûm tahmînen on bir müd tohum istî‘âb eder dokuz kıt‘a tarlalarımın ve iki kıt‘a bir çayır yeri bostanımın hakk-ı tasarruflarını evkāf-ı merkūme mütevellîsi ma‘rifetiyle merkūm Durmuş Çelebi’ye on bin nakd-i râyic fi’l-vakt akçe bedel mukābelesinde ferağ ve tefvîz eylediğimde ol dahi vech-i mübeyyen üzre tefevvuz ve kabûl eyleyip hakk-ı ferağ olan meblağ-ı mezbûr on bin akçeyi yedinden tamâmen ahz ü kabz eylediğimden sonra sâlifü’z-zikr bostan ve çayırı ve ol tarlaları mahallinde zabt ve tasarrufa mezbûr Durmuş Çelebi’yi taslît eyledim dedi dedikde vekîl-i mezbûrun minvâl-i muharrer üzre cârî ve sâdır olan cemî‘ ikrâr ve i‘tirâfını mezbûr Durmuş vicâhen tasdîk ve şifâhen tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ min Şevvâli’l-mükerrem li sene hamsin ve sittîn ve elf. Şuhûdü’l-hâl: Ali Efendi b. Himmet el-İmâm, İsmail Çelebi b. Mehmed, Sefer? Beşe b. İsa, Mehmed Beşe b. Ahmed, Ahmed Beşe b. Ali, Mustafa Çelebi b. Derviş, (….), Mustafa Bey b. Memi? el-Attâr, Ahmed Bey b. Abdullah, Ali Beşe b. Abdullah, diğer Ali b. Mustafa, Bayram Dede b. Mehmed, Mustafa Beşe b. Mehmed ve gayr[uhüm]