Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 123 Hüküm no: 112 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın mülk menzilini Hacı İbrahim b. Hacı Hasan’a sattığı ve bedelini satın aldığı câriye bedeline saydıkları Mahrûse-i Kostantıniyye ebvâbından Topkapısı hâricinde merhûm Merkez Efendi mahallesi sükkânından Hasan b. Abdullah nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb el-Hâc İbrahim b. el-Hâc Hasan nâm kimesne muvâcehesinde bi tav‘i’s-sâf ikrâr-ı tamâm ve takrîr-i kelâm edip mahalle-i mezbûrede vâki‘ bir tarafdan mahalle-i mezbûre imâmına meşrûta olan menzil ve bir tarafdan Hüseyin Bey Vakfı ve bir tarafdan Ali Efendi Vakfı ve bir tarafdan tarîk-i âm ile mahdûd olup iki bâb tahtânî odaları ve bir sofayı ve fırını ve zât-ı eşcâr-ı müsmire ve gayr-ı müsmire hadîkayı ve kenîfi müştemil olan mülk menzilimi bi cümleti’t-tevâbi‘ ve’l-levâhık ile müşârun-ileyh el-Hâc İbrahim’e tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz bin cedîd akçeye bâtten bey‘ ve teslîm ol dahi minvâl-i muharrer üzre iştirâ ve kabûl eyledikden sonra semeni olan meblağ-ı mezbûr sekiz bin akçeyi müşterî-i merkūm el-Hâc İbrahim evsâfı beynimizde ilm-i şer‘î ile ma‘lûm müşterâ ve makbûz Kalender nâm câriye bahâsından zimmetinde olan sekiz bin akçe hakkıyla takas eylediğimde ol dahi mukāssa ve kabûl eyledi, ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye benim alâka ve medhalim yokdur müşterâ-yı mezbûr el-Hâc İbrahim’in mülk-i müşterâsı olmuşdur keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min Şevvâli’l-mükerrem sene hamsin ve sittîn ve elf. Şuhûdü’l-hâl: Ahmed? b. ( ) el-İmâm, Mustafa Halîfe b. Hızır el-Müezzin, Mehmed Çelebi b. Hasan, Ahmed ve Kadri b. Hızır, Nasuh b. Hasan, Ahmed b. Ali, Mehmed Beşe b. Ali, Abdi Beşe b. İskender, Abdülhalim Beşe er-Râcil