Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 126 Hüküm no: 116 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’nın mülk menzilinin Ömer b. Osman’a satılması Medîne-i Ebâ Eyyûb el-Ensârî -dâme fî rıdvâni’l-Bârî- mahallâtından Serv mahallesi sükkânından Mehmed b. Mustafa nâm kimesne meclis-i şer‘-i şerîf-i enverde işbu râfi‘ü’l-kitâb Ömer b. Osman nâm kimesne [ma]hzarında bi tav‘ihî ikrâr ve i‘tirâf edip emlâkimden olup mahalle-i mezbûrede vâki‘ bir tarafdan Yakub Beşe b. Abdullah mülkü ve bir tarafdan Pîr Ahmed nâm kimesne mülkü ve bir tarafdan mekābir-i müslimîn ve bir tarafdan tarîk-i âm ile mahdûd bir bâb fevkānî ve bir [bâb] tahtânî odaları ve bir sofayı ve bir su kuyusunu ve hadîka-i zât-ı eşcâr-ı müsmire ve gayr-ı müsmireyi ve kenîfi müştemil olan mülk menzilimi cümle tevâbi‘iyle mezbûr Ömer’e yedi bin beş yüz cedîd akçeye tarafeynden îcâb [ve] kabûlü hâvî bey‘-i bâtt-ı kat‘î [ile] bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yedi bin beş yüz akçeyi merkūm Ömer yedinden tamâmen ahz ü kabz eyledim ba‘de’l-yevm menzi[l-i] mezkûr mezbûr Ömer’in mülk-i müşterâsıdır ve hakk-ı sırfı olmuşdur keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’l-hâmis aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Mustafa Halîfe el-İmâm, Himmet Beşe b. Mehmed, Mustafa Beşe b. Kurd, diğer Mustafa b. Yusuf, Hasan Beşe b. Abdullah ed-dellâl, Abdullah Beşe b. İskender, Hüseyin Çelebi b. Ali