Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 125 Hüküm no: 115 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Mehmed’in mülk menzilini Emine Hâtun bt. Abdullah’a sattığı Medîne-i Ebâ Eyyûb el-Ensârî -dâme fî rıdvâni’l-Bârî- mahallâtından merhûm Defterdâr Kara Süleyman Çelebi mahallesi sâkinlerinden Hüseyin Çelebi b. Mehmed nâm kimesne meclis-i şer‘-i şerîfde işbu râfi‘atü’l-kitâb Emine Hâtun bt. Abdullah mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Hâfızzâde Mustafa Çelebi mülkü ve bir tarafdan Berber Mustafa mülkü ve iki tarafdan tarîk-i âm ile mahdûd fevkānî ve tahtânî üç bâb odaları ve kenîfi ve cüneyneyi müştemil mülk menzilimi bi cümleti’t-tevâbi‘ ve’l-levâhık mezbûr Emine Hâtun’a yüz elli üç kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan mezbûru’n-na‘t yüz elli üç guruşu merkūme Emine Hâtun yedinden tamâmen ahz ü kabz eyledim ba‘de’l-yevm menzil-i mezkûr mezbûre Emine Hâtun’un mülk-i müşterâsıdır keyfemâ teşâ ve tehtâr mutasarrıfe olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sânî aşer min Şevvâli’l-mu‘azzam li sene hamsin ve sittîn ve elf. Şuhûdü’l-hâl: Mahmud Efendi b. Mehmed el-İmâm, Şaban Bey b. Mustafa, Veli Çelebi b. İsa? el-Müezzin, Mehmed Beşe b. Şaban, Hasan Beşe b. Nasuh, Hasan Beşe b. Abdullah, Mehmed Beşe b. Ahmed ed-dellâl, Mehmed Çelebi b. Sunullah, Abdullah Beşe b. İskender, Hüseyin Çelebi b. Ali