Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 127 Hüküm no: 118 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Yorgi’nin mülk menzilini bey‘ bi’l-vefâ ile Yeni Saray bostancıları odasının para vakfına sattığı Havâss-ı Kostantıniyye kazâsına tâbi‘ Çatalca nâhiyesi muzâfâtından Oklağolu nâm karyede sâkin Yamandi v. Yorgi nâm zimmî meclis-i şer‘-i şerîf-i lâzımü’t-tevkīrde Yeni Saray bostancıları odalarında dolab odası mühimmâtına mevkūfe olan nukūda meşrûtiyet üzre bi’l-fi‘il mütevellî olan Dolabcıbaşı Sefer Usta b. Abdülbâkī tarafından kāimmakām-ı mütevellî ve vekîl-i sâbitü’l-vekâlesi râfi‘-i hâze’l-kitâb Salih Beşe b. Hasan nâm bostânî muvâcehesinde bi’t-tav‘i’s-sâf ikrâr-ı tâm ve takrîr-i kelâm edip silk-i mülkümde münselik olup karye-i merkūmede vâki‘ iki tarafdan tarîk-i âm ve bir tarafdan Estarpo v. Laskari nâm nasrânî mülkü ve bir tarafdan Aleksandri v. Mihal nâm zimmî mülkü ile mahdûd ve mümtâz olan mülk menzilimi merkūm Salih Beşe’ye târih-i kitâbdan doksan gün tamâmına değin bey‘ bi’l-vefâ vechi üzre iki yüz yirmi yedi kıt‘a riyâlî guruş-ı kebîre bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra mârrü’z-zikri yedinden tamâmen ahz ü kabz eyledim eğer meblağ-ı merkūm iki yüz yirmi yedi merkūmü’l-vasf guruşu müşârun-ileyh Salih Beşe’ye ecel-i mezbûr hulûlünde edâ ve teslîmden âciz olursam bey‘-i mezbûr bâtte münkalib olsun dedikde mukırr-ı merkūm Yamandi zimmînin minvâl-i meşrûh üzre cârî ve sâdır olan cemî‘ ikrârını ve takrîrini müşârun-ileyh Salih Beşe bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ gıbbe’t-taleb ketb olundu. Fi’l-hâmis aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Hızır Beşe b. Haydar, Mustafa Beşe b. Ayas, Hüseyin Çelebi b. Ali, Mustafa Beşe b. Mehmed, Ahmed Çelebi b. Hasan, Mehmed Efendi el-Kadı, Bayram Dede b. Mehmed, Abdi el-Muhzır, Dilâver el-Muhzır