Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 127 Hüküm no: 119 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Mehmed’in Kağıthâne’deki evine akıttığı suyollarına müdâhale eden Mehmed Çelebi’nin men edilmesi [Derkenâr] Su hücceti İşbu râfi‘ü’l-kitâbi’l-müstetâb umdetü erbâbü’t-tahrîr ve’l-kalem İbrahim Efendi b. Mehmed meclis-i şer‘-i şerîfde takrîr-i kelâm ve bast-ı merâm edip Havâss-ı sultâniyye -hamâha’llâhu te‘âlâ ani’l-âfât ve’l-beliyye- kazâsına tâbi‘ Kağıthâne demekle ma‘rûf mesîrede mülk menzilim olup ol menzile kadîmü’l-eyyâmdan cârî olan mülk suyumun mürûr-ı eyyâm ve kürûr-ı a‘vâm ile yolları harâb olup ta‘mîr sadedinde iken ecânibinden Mehmed Çelebi nâm mütevellî bi gayr-ı vech-i şer‘î ol mülk suyumun yollarını bozup tağallüben zabt etmek murâd eder kıbel-i şer‘den üzerine varılıp keşf ve müşâhede olundukdan sonra ma‘lûmları mevkūfları olan müslimînin haberleri tahrîr olunmak matlûbumdur dedikde cânib-i şer‘-i mutahhardan umdetü’l-müderrisîn Mevlânâ Mustafa Efendi b. Hasan irsâl olunup ol dahi zeyl-i vesîkada mastûrü’l-esâmî müslimîn ile mezbûr İbrahim Efendi’nin mesîre-i merkūmede vâki‘ menziline varıp mâ’-i mezbûrun mecrâsından cereyân-ı kadîmine değin nazar olundukda mâ’-i mezbûr mukaddemâ menzil-i merkūma cârî olduğunu müşâhede ve mu‘âyene eylediklerinden sonra udûl-i ricâlden fahrü’l-müderrisîn Mehmed Efendi b. Mustafa ve Mustafa Efendi b. Mehmed ve Halil Efendi b. Mehmed ve Mehmed Efendi b. Abdülkerim ve Dilâver Bey b. Abdullah nâm kimesneler fi’l-hakīka mâ’-i mezbûr müşârun-ileyh İbrahim Efendi’nin mülk-i müşterâsıdır, zîrâ kadîmü’l-eyyâmdan menzil-i merkūma cereyân eylediği ma‘lûmumuzdur deyû her biri haber verdiklerinde vâki‘ü’l-hâli Mevlâ[nâ]-yı mûmâ-ileyh mahallinde ketb ü tahrîr ba‘dehû meclis-i şer‘-i şerîfe gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Mustafa Efendi b. Mehmed el-Kadı, Sunullah Çelebi b. Mehmed, Hüseyin Çelebi b. Ali, Mehmed Çelebi b. Hasan, İbrahim Çelebi b. Ali, Ömer Bölükbaşı b. Abdullah, Hüseyin Çelebi b. Ali, Mehmed Beşe b. Ali