Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 150 Hüküm no: 150 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yani’nin ölen Mile’deki alacağını kefillerinden talebi, sonra da davasından vazgeçmesi Mahrûse-i İstanbul’da bakkal tâ’ifesinden İstati v. Yani nâm zimmî meclis-i şer‘-i şerîf-i lâzımü’t-tevkīrde işbu hâmileyü’l-vesîka Dimo v. Keşro ve diğer Dimo v. Niko nâm zimmîler muvâcehelerinde üzerlerine da‘vâ ve takrîr-i kelâm edip bundan akdem hâlik olan Mile nâm zimmî zimmetinde cihet-i deyn-i şer‘îden altı bin akçe hakkım olup meblağ-ı mezbûra mezbûrân Dimo ve diğer Dimo emr ve kabûlü hâvî kefâlet-i sahîha-i şer‘iyye ile kefîl bi’l-mâl olmuşlar idi, hâlen meblağ-ı mezbûru kefâletleri hasebiyle merkūmândan taleb ederin suâl olunsun dedikde gıbbe’s-suâl mezbû[r]ân zimmîler cevâblarında hâlik-i mezbûrun nefsine kefîl olmuş idik lâkin vech-i muharrer üzre kefîl bi’l-mâl olduklarını münkirler olduklarında müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf eyledikde anlar dahi yemîn sadedinde iken mezbûr İstati mezbûrân zimmîleri yemînden afv ve husûs-ı mezbûra müte‘allik cemî‘ da‘vâdan mezbûrân zimmîlerin zimmetlerini ibrâ ve iskāt etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Bayram Sofu, Mustafa Beşe, Hüseyin Beşe, Abdi Beşe