Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 151 Hüküm no: 152 Orijinal metin no: [29a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasandıra bt. Yani’nin Kostantin v. Aleksi ile nikâhlandığı Havâss-ı aliyye kazâsına tâbi‘ Avasya demekle ma‘rûf karye sâkinelerinden Kasandıra bt. Yani nâm nasrâniye tarafından tezvîc-i âti’z-zikre vekîli olup merkūmeyi ârifân olan Nikola v. Yorgo ve Yorgi v. Yani nâm zimmîler şehâdetleriyle şer‘an vekâleti sâbite olan Yani v. Meleş nâm zimmî meclis-i şer‘-i şerîf-i enver ve mahfil-i dîn-i münîf-i ezherde işbu hâmilü’s-sifri’ş-şer‘î Kostantin v. Aleksi nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilem merkūm[e] Kasandıra’nın nefsini üç bin akçe mehr-i müeccel ile vekâlet-i mahkiyem hasebiyle mersûm Kostantin’e tezvîc-i inkâh eyledim merkūm Kostantin dahi müvekkil[e]-i merkūmeyi nefsi için vech-i meşrûh üzre tezevvüc ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Sinan Efendi el-Kadı, Abdullah Efendi el-Kadı, Ahmed Efendi b. Mehmed, Mehmed Efendi b. Nasuh, Ali Beşe b. İskender, Bayram Dede