Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 154 Hüküm no: 155 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Süleyman’ın zevci Halil b. İbrahim’den muhâlaa ile boşandığı Medîne-i Hazret-i Ebâ Eyyûb el-Ensârî -razıye anhü rabbühü’l-Meliki’l-Bârî- mahallâtından Ali Paşa mahallesi sâkinelerinden Ümmühâni bt. Süleyman nâm hâtun meclis-i şer‘-i şerîf-i lâzımü’t-tevkīrde zevci işbu hâmilü’l-kitâbi’l-müstetâb Halil b. İbrahim nâm kimesne mahzarında bi tav‘ihâ ikrâr ve i‘tirâf edip zevcim mezbûr Halil ile hüsn-i zindegânemiz olmayıp beynimiz[de] şikāk-ı küllî vâki‘ olmağın zimmetinde mütekarrir olan bin dört yüz cedîd akçe mehr-i müeccelimden geçip ve nafaka-i iddet-i şer‘iyyem ve me’ûnet-i süknâm kendi üzerime olmak [üzre] mezbûr Halil ile muhâla‘a-i sahîha-i şer‘iyye ile muhâla‘a eyledikden sonra bedel-i hul‘ olmak üzre emlâkimden iki zincir yastık ve bir münakkaş yüz yastığı ve bir sırmaî atlas yorgan ve bir çarşaf ve iki münakkaş bohça ve bir döşeğimi mezbûr Halil yedine teslîm ol dahi minvâl-i muharrer üzre kabz ve tesellüm eyleyip zimmetini zevciyete müte‘allik âmme-i da‘vâdan ibrâ ve iskāt eyledim dedikde merkūm Halil dahi vech-i meşrûh üzre olan hul‘ı kabûl edip mezbûr Ümmühâni’nin zimmetini ze[v]ciyyete müte‘allik cemî‘ da‘vâ ve mütâlebeden ibrâ ve iskāt eyledim dedikde ahadühümânın âharın kelimât-ı mahkiyesini vicâhen ve şifâhen tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Abdullah Efendi b. Mehmed el-Kadı, İsmail Bey b. Hasan, Halil Çelebi b. İbrahim, Mustafa Çelebi b. İdris, Davud Halîfe b. Mehmed el-İmâm