Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 152 Hüküm no: 154 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Bey b. Abdülbâki’nin tasarrufunda olan Davud Ağa Vakfı’na ait harap durumdaki menzilin tamir edildiği ve yapılan tamiratın keşfi Medîne-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesinde sâkin umdetü’l-eşbâh Cafer Bey b. Abdülbâkī nâm kimesne meclis-i şer‘-i şerîf-i lâzımü’t-teşrîfde takrîr-i kelâm [ve] ta‘bîr ani’l-merâm edip mahrûse-i Galata’da vâki‘ merhûm Davud Ağa Vakfı’ndan olup mahalle-i mezbûr[e]de vâki‘ bir tarafdan Yakub Çelebi b. Mehmed nâm kimesne mülkü ve bir tarafdan mahalle-i merkūme imâmına meşrûta olan vakıf menzil ve bir tarafdan Bîzebân nâm hâtun vakfı ve bir tarafdan tarîk-i âm ile mahdûd olup fevkānî ve tahtânî büyût-i müte‘addideyi ve bir kıt‘a bostanı müştemil olan menzil icâre-i müeccele ve mu‘accele-i ma‘lûme[teyn ile] tasarrufumuzda olup lâkin menzil-i mezbûr mürûr-ı eyyâm ve kürûr-ı a‘vâm ile harâba müşrif oldukda bundan akdem izn-i mütevellî-i vakf-ı mezbûr ile menzil-i merkūmu ta‘mîr ve termîm ve ihdâs-ı binâ etmişidim, hâlen icâre-i mu‘acceleme mahsûb olmak üzre ihdâs eylediğim bir kıt‘a bakkal dükkânı ile iki bâb oda ve bir kıt‘a bostan kapısının mertebe-i tahammülü keşf ve mesâha olunmak bâbında kıbel-i şer‘den üzerine varılmasın murâd ederin dedikde savb-ı şer‘-i şerîfden umdetü’l-müderrisîn Surûrî Mustafa Efendi irsâl olunup ol dahi hâssa mi‘mârlarından üstâd Şaban b. Veli ve sukūf ve ebniye ahvâline kemâl mertebe vukūfu ve şu‘ûru olup zeyl-i kitâbda isimleri mastûr olan bî-garaz müslimîn ile üzerine varıp mi‘mâr-ı mezbûr zikr olunan Davud Ağa Vakfı’na hâlen mütevellî olan fahrü’l-emsâl el-Hâc Musa Bey b. Veli nâm bevvâbü’s-sultânî muvâcehesinde mesâha ve takvîm eyledikde tûlen on üç arzan on zirâ‘ bi hesâb-ı satrancî yüz otuz zirâ‘ müceddeden binâ olunan bakkal dükkânı sakfının beher zirâ‘ı kırkar akçeden beş bin iki yüz akçe ve tûlen ve arzan bi hesâbi’l-mezbûr iki yüz zirâ‘ cedîd tavanın beher zirâ‘ı kezâlik kırkar akçeden sekiz bin akçe ve tûlen ve arzan bi hesâbi’l-mezbûr iki kat tahta döşemesinin beher zirâ‘ı onar akçeden cem‘an iki yüz zirâ‘ iki bin akçe ve tûlen yirmi ve arzan on zirâ‘ bi hesâbi’l-mezbûr iki yüz zirâ‘ tahta perdenin beher zirâ‘ı onar akçeden iki bin akçe ve tûlen altmış ve kadden üç zirâ‘ bi hesâb-ı terbî‘î yüz seksen zirâ‘ taş duvarın beher zirâ‘ı ellişer akçeden dokuz bin akçe ve tûlen ve kadden bi hesâb-ı terbî‘î iki yüz elli zirâ‘ dolma duvarın beher zirâ‘ı kırkar akçeden on iki bin akçe ve tûlen ve arzan bi hesâb-ı satrancî yüz kırk zirâ‘ kepenk tavanının beher zirâ‘ı kırkar akçeden dokuz bin altı yüz akçe ve yüz aded İznikmid tahtasının beher dânesi onar akçeden bin akçe ve altı direk kırkar akçeden iki yüz kırk akçe ve müceddeden binâ olunan bir bâb fevkānî odanın sakfı ve dolma duvarları ve direkleri ve ocağı ve nerdübânı ve dolabları ve taş duvarları ber vech-i maktû‘ yirmi bin akçe ve müceddeden binâ olunan dört kıt‘a fevkānî kenîf beher dânesi biner akçeden dört bin akçe ve yirmi aded başlığıyla direk beher dânesi yüzer akçeden iki bin akçe ve müceddeden ihdâs olunan dokuz kıt‘a odalar musandarasının beher dânesi biner akçeden dokuz bin akçe ve üç kıt‘a mükemmel nerdübân ber vech-i tahmîn iki bin akçe ve odalar ifrâzına ve bostan havlusuna binâ olunan bin aded İznikmid tahtasının beher dânesi onar akçeden on bin akçe ve tûlen on altı zirâ‘ [ve] arzan dört bi hesâb-ı terbî‘î altmış dört zirâ‘ havzın beher zirâ‘ı kırkar akçeden iki bin beş yüz seksen akçe ve müceddeden kârîz için binâ olunan altmış aded künkün beher dânesi yirmişer akçeden altı yüz akçe ve tûlen on iki zirâ‘ kadden sekiz bi hesâb-ı satrancî doksan altı zirâ‘ dolma oda duvarı[nı]n beher zirâ‘ı kırkar akçeden üç bin sekiz yüz kırk akçe ve bostan için müceddeden binâ olunan kuyu üzerinde vâki‘ dolab ve ve çarh ve ipin ber vech-i maktû‘ beş bin yedi yüz kırk akçe ve ol bostan kuyusunun dibinde vâki‘ su celb? etmek için binâ olunan üç aded lağım her birisi on [30a] on bin akçeden otuz bin akçe ve on iki kulaç müceddeden binâ olunan bostan kuyusunun beher kulacı biner akçeden on iki bin akçe ve bâlâda ta‘mîr olunan odaların ta‘mîr olan pencereleri ve sâir odaların ta‘mîrâtına ber vech-i maktû‘ bin akçe ki cem‘an yüz elli bin akçeye bâliğ mi‘mâr-ı mezbûr ve sâir ehl-i vukūf işbu ihdâs olunan ebniye ve sâir ta‘mîrât ancak yüz elli bin akçe ile olur bundan ekal ve noksan ile olmaz deyû her biri icmâ‘ ve ittifâk eylediklerini Mevlânâ-yı müşârun-ileyh mahallinde ketb [ve] tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ alâ hâze’l-minvâl ketb ve sebt olundu. Fî gurreti Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi b. Ali el-İmâm, diğer Mehmed Efendi b. Mehmed el-Müezzin, Mustafa Çelebi b. Mehmed, Mustafa Çelebi [b.] Musa, Mehmed Çelebi b. Şeyh Hızır, Mehmed Beşe b. Abdülbâkī, Mustafa Çelebi b. Ahmed, Hasan Beşe b. Mustafa, Mehmed b. Bayezid, Mehmed Beşe b. Ahmed, diğer Mehmed Beşe b. Ali, Mahmud Beşe b. Hüseyin, Abdi Beşe b. İskender, Mustafa Beşe b. Mehmed ve gayruhüm mine’l-hâzırîn