Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 156 Hüküm no: 157 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alacaklılarından kaçan Yusuf Bey b. Mahmud Paşa’nın tayin edilen mübâşir vasıtasıyla mallarına el konulduğu, vekilinin borçları ödemek üzere malları teslim aldığı Vilâyet-i Rumeli’nde Avlonya kasabası sâkinlerinden fahrü’l-eşbâh Yusuf Bey b. el-merhûm Mahmud Paşa tarafından husûs-ı âti’z-zikre vekîl olup Mehmed Beşe b. Hasan ve Hasan Beşe b. Abdi nâm kimesneler şehâdetleri ile şer‘an vekâleti sâbite olan Mustafa Beşe b. Mehmed nâm vekîl meclis-i şer‘-i şerîf-i lâzımü’t-teşrîfde Dergâh-ı âlî çavuşlarından işbu hâmilü’l-kitâb umdetü’l-cüyûş Yusuf Çavuş b. Abdülmennân mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Yusuf Bey bundan akdem dâyinlerinden firâr etmekle erbâb-ı düyûn yediyle firâr eylediği menzilde mevcûd olan eşyâsı kabz olunmak için buyruldu-yı şerîf vârid olup mezbûr Yusuf Çavuş mübâşir ta‘yîn olunmağla müvekkilim mezbûr Yusuf Bey’in mârrü’z-zikr menzilde mevcûd olan eşyâsını mukaddemâ mübâşir-i mezbûr yedinde olan buyruldu-yı şerîf mûcebince kabz etmişidi, hâlen erbâb-ı düyûn huzûr-ı hâkimde? haklarını muvâcehemde isbât etmeğin ben dahi vekâlet-i mahkiyem hasebiyle mübâşir-i mezbûr fermân-ı âlî ile kabz edip yedinde mevcûd olan bir çarşaf ve bir berber peşkiri ve üç makrama ve bir beyaz sâde ve iki gömlek ve bir don ve bir beyaz bohça ve bir sarık ve bir sarı şal ve bir uçkur ve bir yüz yastığı ve bir abdest makraması ve bir çift papuç ve bir zıbın ve iki kavuk ve bir kalpak ve bir tarak ve bir yorgan ve bir kırmızı velençe ve bir kırmızı çultar ve bir kırmızı kilim ve bir yeşil kadife yastık ve iki ibrik ve bir leğen ve bir sofra ve bir güğüm ve iki tencere ve altı sahan ve bir baklava tepsisi ve bir tâbe ve bir satır ve bir kevgir ve otuz kaşık ve bir şamdan ve bir mikdâr zeytin ve üç zil ve sekiz çakşır ak ve iki çan ve iki matbah sepeti ve üç garâr ve bir balta ve bir kırmızı ihrâm ile bir doru ve bir siyah iki re’s katırları mübâşir-i merkūm Yusuf Çavuş yedinden tamâmen ahz ü kabz eyledim ba‘de’l-yevm mübâşir-i mezbûr yedinde müvekkilim mezbûr Yusuf Bey’in bir şeyi kalmadı dedikde mukırr-ı mezbûrun bi’l-vekâle cârî olan ikrârını mezbûr Yusuf Çavuş vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Fi’l-yevmi’s-sâdis min Zilka‘deti’ş-şerîfe li sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Sinan Efendi b. el-Hâc Derviş, Mehmed Efendi b. Nasuh, Mustafa Efendi b. Hasan el-Müderris, Ahmed Çelebi b. Mehmed, Abdullah b. İskender ve gayr