Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 126 Hüküm no: 144 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerilerinden Ahmed’in yasakçı tayin olunduğu Hâlâ Maldepe-i kebîr ve sagīr kādısı izzetlü fazîletlü efendi hazretlerinin huzûrlarına mezîd-i i‘zâz ithâfından sonra inhâ-i muhibbânemiz budur ki Kadîm-i eyyâmdan bâ-hatt-ı hümâyûn-ı şevket-makrûn Dergâh-ı âlî yeniçerini [yeniçerilerinin] postal-baha ta‘yîn ve ihsân buyrulmakla kolluklarından hâlâ taht-ı hükûmetinizde vâki‘ yasakçı olan ref‘ olunup yerine işbu sene-i sâbık üzere Dergâh-ı âlî yeniçerilerinden yirmi beş bölüğün Seyyid Ahmed nâm yoldaş işbu bin yüz seksen iki senesi mâh-ı Şa‘bân-ı şerîfi’nin gurresinden sene-i kâmilesine değin yalnız iki değnek verilüp yasakçı nasb u ta‘yîn olunmağın işbu mektûb tahrîr ve irsâl olundu vusûlünde gerekdir ki merkūmu yasakçılık umûrunda kıyâm ve istihdâm eyleyüp âharı müdâhale etdirmeyüp tarafınıza mürâca‘at eylediği umûr [u] husûslarına bi-hasebi’ş-şer‘ ve kānûn imdâd ve i‘ânet eyleyüp hilâf-ı şer‘ ve mugāyir-i kānûn bir kimesneye rencîde ve remîde etdirmeyesin. Tahrîren fi’t-târîhi’l-mezkûr.