Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 217 Hüküm no: 236 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ahmed’in Rus asıllı Ahmed b. Dilaver adlı kölesini vasiyet yoluyla azat eylediği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Kiremitçi Süleyman Çelebi mahallesi sâkinlerinden fahrü’l-eşbâh Hasan Bey b. Ahmed nâm cündî meclis-i şer‘-i şerîf-i lâzımü’t-teşrîfde abd-i memlûkü işbu râfi‘ü’l-vesîka açık kaşlı sar[ı] elâ gözlü Rusiyyü’l-asl Ahmed b. Dilâver nâm gulâm-ı şâbb-ı emred muvâcehesinde bi’t-tav‘ ve’l-ihtiyâr lâ-bi’l-kerh ve’l-icbâr ikrâr ve i‘tirâf edip gulâm-ı mevsûf-ı mezbûru bi emrillâhi’l-meliki’l-müte‘âl dâr-ı fenâdan dâr-ı bekāya intikāl ve irtihâl etmezden kırk gün mukaddem âzâd olmak üzre tedbîr-i mukayyed ile gulâm-ı mevsûf-ı mezbûru tedbîr eyledim gulâm-ı mevsûf-ı mezbûr kazâ-i nahb eylediğimde sâir harâir-i asliyyîn gibi hür olup veresemden kimesne gulâm-ı mezbûra vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye dahl ve ta‘arruz etmeyeler dedikde mukırr-ı merkūm Hasan Bey’in minvâl-i muharrer üzre cârî ve sâdır olan cemî‘ ikrâr ve i‘tirâfların gulâm-ı mevsûf-ı mezbûr vicâhen ve şifâhen tasdîk etmeğin mâ hüve’l-vâki‘ bi’l-ibtigā ketb olundu. Fî evâhiri Zilhicceti’l-harâm li sene hamsin ve sittîn ve elf. Şuhûdü’l-hâl: Mustafa Çelebi b. Ali, Mehmed Çelebi b. Mustafa, Mehmed Çelebi b. Hasan, Ahmed Efendi b. Mehmed, Mustafa b. Mehmed, Ali Beşe b. Mustafa, Hüseyin b. Ali, Bayram Sofu b. Mehmed ve gayruhüm mine’l-hâzırîn