Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 216 Hüküm no: 235 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Mahmud’un mülk menzil arsasını Mehmed Çelebi b. Mustafa’ya sattığı Medîne-i Ebâ Eyyûb el-Ensârî -dâme fî rıdvâni’l-Bârî-’de merhûm Kiremitçi Süleyman Çelebi mahallesi sâkinlerinden fahrü’l-eşbâh Hasan Bey b. Mahmud nâm cündî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Mehmed Çelebi b. Mustafa nâm kimesne muvâcehesinde bi’t-tav‘i’s-sâf ikrâr ve i‘tirâf edip silk-i mülk-i sahîhimde münselik olup mahrûse-i Galata tevâbi‘inden İstinye nâhiyesi muzâfâtından Telli köyü demekle ma‘rûfe karyede vâki‘ bir tarafdan yine benim mülküm olan menzil ve bir tarafdan Dilâver b. Abdullah mülkü ve bir tarafdan tarîk-i âm ve bir tarafdan tarîk-i hâs ile mahdûd olup eşcâr-ı müsmire ve gayr-ı müsmire hadîkayı müştemil olup İprivî yeri demekle ma‘rûfe olan mülk menzil arsasını cümle tevâbi‘ ve levâhıkı ile mezbûr Mehmed Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile üç bin yüz cedîd akçeye bâtten bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyledikden sonra semen olan meblağ-ı mezbûru yedinden tamâmen ahz ü kabz eyledim ba‘de’l-yevm arsa-i merkūmede benim vechen mine’l-vücûh alâka ve medhalim yokdur merkūm Mehmed Çelebi’nin mülk-i müşterâsıdır keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Zilhicceti’ş-şerîfe min şuhûri sene hamsin ve sittîn ve elf. Şuhûdü’l-hâl: Mustafa Efendi b. Hasan, Mehmed Efendi b. Habil, Ahmed Efendi b. Mehmed, el-Hâc Mahmud b. Mustafa, Ali Beşe b. Mustafa, Mustafa Çelebi b. Hüsam Efendi, Hüseyin? b. Ali ve gayr