Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 218 Hüküm no: 238 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Efendi b. Ebîbekir’in mülk menzilinin Fâtıma Hâtun bt. Mustafa’ya satılması Medîne-i Hazret-i Ebâ Eyyûb el-Ensârî -razıye anhü rabbühü’l-Me[li]kü’l-Bârî-de Evlice Baba mahallesi sâkinlerinden Şaban Efendi b. Ebîbekir nâm kimesne meclis-i şer‘-i şerîf-i enverde işbu sâhibetü’l-kitâb Fâtıma Hâtun bt. Mustafa nâm hâtun mahzarında bi tav‘ihî ikrâr ve i‘tirâf edip silk-i mülk-i sahîhimde münselik olan emlâkimden olup medîne-i mezbûrede Zeyneb Hâtun mahallesinde vâki‘ bir tarafdan Mehmed Usta mülk[ü] bir tarafdan ba‘zan Mehmed Efendi ve ba‘zan Cenâne Hâtun mülkleri ve bir tarafdan Mehmed Çelebi mülkü ve bir tarafdan tarîk-i âm ile mahdûd ve mümtâz iki bâb fevkānî ve üç bâb tahtânî odaları ve sofayı ve iki su kuyusunu ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bi cümleti’t-tevâbi‘ ve’l-levâhık mezbûre Fâtıma Hâtun’a fıddî râyic fi’l-vakt yirmi beş bin akçeye bey‘-i kat‘î ile bey‘ ve teslîm ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan mârrü’z-zikr yirmi beş bin akçeyi merkūme Fâtıma Hâtun yedinden tamâmen ahz ü kabz eyledim ba‘de’l-yevm menzil-i mezkûrda benim alâka ve medhalim yokdur mezbûre Fâtıma Hâtun’un mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîk[i’ş-]şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mehmed Beşe b. Mustafa, es-Seyyid İbrahim Çelebi b. Halil, Hasan Efendi b. Hüseyin, Hüseyin Efendi b. Mehmed el-İmâm, Ali Bey b. Murtaza, Ali Bey b. Mustafa, Abdullah b. İskender