Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 219 Hüküm no: 239 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Beşe b. Mehmed’in mülk menzilini Otakçı mahallesinin avârız vakfına bey‘ bi’l-istiğlâl yoluyla sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Otakçı mahallesi sâkinlerinden Yusuf Beşe b. Mehmed nâm râcil meclis-i şerî’at-i şerîfede mahalle-i mezbûrenin avârızı vakfına hâlen mütevellî olan işbu hâmilü’l-kitâb Murad Beşe b. Mehmed nâm mütevellî mahzarında bi’t-tav‘ ve’r-rızâ ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Ali Çelebi mülkü ve bir tarafdan İbrahim b. Mustafa mülkü ve bir tarafdan ba‘zan el-Hâc Mehmed ve ba‘zan Yusuf mülkleri ve bir tarafdan tarîk-i âm ile mahdûd mülk menzilimi bi cümleti’t-tevâbi‘ ve’l-levâhık mütevellî-i mezbûr Murad Beşe’ye beher riyâlî guruş seksen beşer akçeye olmak üzre otuz yedi buçuk kıt‘a riyâlî kebîr guruşa bi tarîki’l-istiğlâl bey‘ edip ve kabz-ı semen ve teslîm-i mebî‘ eylediğimden sonra yine mütevellî-i mezkûr menzil-i mahdûdu ba‘de’t-tahliyeti’ş-şer‘iyye târih-i kitâb senesi şehri Ramazânü’l-mübârek gurresinden üç sene tamâmına değin beher sene dörder yüz ellişer akçeden cem‘an bin üç yüz elli akçe ücret ile bana îcâr ve teslîm ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î yine mahalle-i mezbûrede sâkin Selim Beşe b. Ali nâm râcil mütevellî-i mezbûr muvâcehesinde takrîr-i kelâm edip menzil-i mezkûrun derkine ve ücret-i merkūmeye tarafeynden emr ve kabûlü hâviye kefâlet-i sahîh[a]-i şer‘iyye ile kefîl oldum dedikde vâki‘ü’l-hâl bi’l-ibtigā ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe sene hamsin ve sittîn ve elf. Şuhûdü’l-hâl: Mustafa b. Habib el-Müezzin, Mehmed Çelebi b. Ahmed, Mehmed Efendi b. Sefer el-İmâm, Mustafa b. Abdullah, Halil Beşe er-Râcil