Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 221 Hüküm no: 242 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Handan Beşe’nin evine hırsızlık için giren Kurd’u harbe ile başına vurarak öldürdüğü, cesedinin keşfi Havâss-ı sultâniyye kazâsına tâbi‘ Terkos nâhiyesi ihtivâsından El-Hâc Mihaliç demekle ma‘rûfe karye sâkinlerinden işbu râfi‘ü’l-kitâb Handan Beşe b. Abdullah nâm râcil meclis-i şer‘-i şerîfde takrîr-i kelâm edip târih-i kitâb gecesi nısfu’l-leylde ben zevcem ile uykuda iken karye-i merkūmede ter oğlanı Kur[d] nâm zimmî sokak kapısı ile harmanım kapısını açıp haremime girip ben dahi evime harâmzâde girmişdir deyû haberdâr olduğumda evimden harbe ile taşra haremime çıktığımda mezbûr Kurd beni elinde olan âlet-i harble urup boşa getirip ben dahi harbe ile darb eylediğimde başının sol tarafına darb ve katl eyledim kıbel-i şer‘-i şerîfden üzerine varılıp keşf ve müşâhede olunmak matlûbumdur dedikde savb-ı şer‘-i kavîmden umdetü’l-müderrisîn Mevlânâ Receb Efendi irsâl olunup ol dahi zeyl-i sahîfede mastûrü’l-esâmî müslimîn ile katîl-i mezbûrun üzerine varıp fi’l-vâki‘ mezbûr Kurd serika kasdıyla merkūm Handan Beşe’nin menziline girip hareminde katl olunduğu ve eser-i cerhi başının sol tarafında olduğunu ba‘de’l-keşf müşâhede ve mu‘âyene eylediklerini ve ahâlî-i karye-i merkūme katîl-i merkūmun kendi hâlinde olmayıp harâmiyyûn ve eşkiyâdandır deyû haber verdiklerini Mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb [ketb] olundu. Fî gurreti Muharremi’l-harâm li sene sittîn ve sittîn ve elf. Şuhûdü’l-hâl: Ömer Ağa b. Mehmed, Mehmed Çelebi b. Ahmed, Receb Efendi b. Mehmed, Ahmed Çelebi b. Mustafa, Mehmed Beşe b. Ali, Bayram Ağa b. Ali, Mehmed Beşe b. Ali, Mahmud Beşe b. Abdullah, Mustafa Beşe b. Abdullah, Bayram b. Abdullah