Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 221 Hüküm no: 243 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Yorgi’nin aldığı borcu ödeyen kefiline mülk evini bey‘ bi’l-vefâ ile sattığı Medîne-i Gelibolu’ya tâbi‘ Şehirköyü nâhiyesi muzâfâtından Hora nâm karye sâkinlerinden Kostantin v. Yorgi nâm zimmî husûs-ı câ’i’z-zikri ikrâra kendi tarafından asîl ve li ebeveyn er karındaşı Yamadi nâm nasrânî tarafından sâbitü’l-vekâle vekîl olmağla meclis-i şer‘-i şerîf-i lâzımü’t-tevkīrde işbu râfi‘ü’s-sifr Dimo v. Andriye nâm [zimmî] muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip hâlen mahrûse-i İstanbul’da mesned-nişîn-i hükûmet olan a‘lemü’l-ulemâ’i’l-izâm efdalü’l-fuzalâ’i’l-fihâm câmi‘u’l-fürû‘ ve’l-usûl hâvi’l-ma‘kūl ve’l-menkūl yenbû‘ü’l-fezâ’il metbû‘ü’l-efâzıl zü’l-hubbi’z-zâhir kâbiren an kâbir Şeyhîzâde Efendi hazretlerinin cedleri vakfına zimmetimizde on altı bin akçe deynimiz olup meblağ-ı mezbûra mersûm Dimo emr ve kabûlü hâviye kefîl olmağla müşârun-ileyh Şeyhîzâde Efendi hazretleri vakf-ı mezbûra meşrûtiyet üzre mütevellî olmağın meblağ-ı mezbûru târih-i kitâbdan bir buçuk sene mukaddem kefîl-i merkūm ile bizden taleb ve vekîli gāib ani’l-meclis Mehmed Efendi yediyle on bir bin akçesini kefîl-i merkūmdan ve beş bin akçesini bizden tamâmen kabz etmekle kefîl-i mezbûr Dimo’ya vech-i muharrer üzre on bir bin akçe deynimiz olmuşidi hâlen ber vech-i iştirâk mülkümüz olup karye-i mersûmede vâki‘ iki tarafdan Toma v. Tanaş mülkü ve bir tarafdan sâhil-i bahr ve bir tarafdan tarîk-i âm ile mahdûd olup büyût-i adîdeyi ve hadîkayı müştemil olan mülk menzilimizi târih-i kitâbdan üç sene tamâmına değin bey‘ bi’l-vefâ vechi üzre meblağ-ı mezbûr on bir bin akçeye merkūm Dimo’ya bey‘ edip ol dahi vefâ vechi üzre iştirâ ve kabûl eyleyip eğer meblağ-ı mezbûru ecel-i mezbûr hulûlünde kefîl-i merkūm Dimo’ya edâ ve teslîm etmezsek bey‘-i mezbûr bâtte münkalib olsun dedikde gıbbe’t-tasdîki’ş-şer‘î mebî‘-i mezbûru mahallinde zabt ve tasarrufa müşterî-i mezbûr Dimo’yu taslît eyledim dedikde gıbbe’t-tasdîki’l-mu‘teber [ketb olundu]. Fi’l-yevmi’s-sâlis mine’l-Muharremi’l-harâm sene [10]66. Şuhûdü’l-hâl: Mustafa Çelebi el-Mütevellî, Hasan Çelebi b. ( ), Ali Beşe b. Mustafa, Hüseyin Beşe b. Ali, Bayram Sofu b. Mehmed, Abdi el-Muhzır, İstati v. Armağan, Polo? v. Todori, Yani v. Kosta, Rizo v. Çalık, Riso v. Dolu