Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 237 Hüküm no: 262 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beto v. Kika’nın mülk menzil ile bağdaki yarı hissesini Suter v. Mestı’ya sattığı Vilâyet-i Rumeli’nde Arnavud Belgradı kazâsına tâbi‘ Sine nâm karyeden Beto v. Kika nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Suter v. Mestı nâm zimmî muvâcehesinde bi’t-tav[‘] ve’r-rızâ ikrâr ve i‘tirâf edip karye-i mezbûrede vâki‘ bir tarafdan Lasko v. Zatı mülkü ve bir tarafdan Nikola v. Andriye mülkü ve bir tarafdan Lasko v. Betofranci mülkü ve bir tarafdan ba‘zan Yani mülkü ve ba‘zan tarîk-i âm ile mahdûd iki bâb tahtânî odaları ve bir kıt‘a anbarı ve harman yerini ve bahçeyi müştemil mülk menzilde ve içinde mevcûd dö[r]t fıçı ve bir şırahâne ve üç tencere ile menzil-i mezkûr kurbunda vâki‘ bir kıt‘a mülk bağımın nısf hisse-i şâyi‘alarını merkūm Suter’e beş bin cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i adîdede vâki‘ her birinin hudûdu beynimizde ma‘lûm on beş kıt‘a tarlamın dahi nısf hisse-i şâyi‘alarını dahi mezbûr Suter’e iki bin akçe bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semen-i mezbûr ile bedel-i mezkûr ki cem‘an yedi bin akçeyi mersûm Suter yedinden tamâmen ahz ü kabz eylediğimden sonra zikr olunan emlâk ve tarlalarda olan nısf hisse-i şâyi‘alarımı mahallinde zabt ve tasarrufa merkūm Suter’i tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ali b. Mustafa, Abdullah b. İskender, Hüseyin b. Ali, Dilâver b. Abdullah, Mato v. Tepo, Ded v. Kolo, Kiko v. Kolo, Kosta v. Kolo, Martı v. Yani, İstanbo v. Mato