Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 235 Hüküm no: 261 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Mahmud’un vârislerinden oğlu Mahmud Ağa’nın mülk menzildeki miras hissesini Osman Ağa b. Hüseyin’e sattığı Husûs-ı câ’i’z-zikrin mahallinde tahrîri iltimâs olunmağın kıbel-i şer‘-i şerîfden umdetü’l-müderrisîn Mevlânâ Mustafa Efendi irsâl olunup ol dahi zeyl-i kitâbda mastûrü’l-esâmî müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kasım Paşa mahallesi sâkinlerinden olup bundan akdem fevt olan Ahmed Efendi b. Mahmud’un sulbî kebîr oğlu umdet-i erbâb-ı tahrîr ve’l-kalem zübdet-i ashâbü’t-tastîr ve’r-rakam Ahmed Efendizâde Mahmud Ağa’nın menziline varıp akd-i meclis-i şer‘-i şerîf eyledikde müteveffâ-yı mezbûr Ahmed Efendi’nin verâseti zevce-i metrûkesi Hatice Hâtun bt. Ali ile sulbî oğlu mezbûr Mahmud Ağa’ya ve sulbiye sagīre kızı Fâtıma’ya münhasıra olup ba‘dehû kable’l-kısme merkūme Fâtıma dahi vefât edip verâseti vâlidesi mersûme Hatice Hâtun ile er karındaşı ( ) nâm sagīre ve li eb er karındaşı merkūm Mahmud Ağa’ya münhasıra olduğu ve mezbûrûnun tashîh-i mes’eleleri bi hükmi’l-münâsahati’ş-şer‘iyye yüz kırk dört sehimden farz olup sihâm-ı mezbûreden yirmi beş sehmi merkūme Hatice Hâtun’a ve yedi sehmi mezbûr sagīre ( ) ve yüz on iki sehmi müşârun-ileyh Mahmud Ağa’ya isâbet ve intikāl eylediği şer‘an zâhir oldukdan sonra müşârun-ileyh Mahmud Ağa meclis-i ma‘kūd-ı mezkûrda işbu râfi‘ü’l-vesîka umdetü’l-ekârim Osman Ağa b. Hüseyin nâm kimesne mahzarında ikrâr ve i‘tirâf edip müteveffâ-yı mezbûr Ahmed Ağa’nın muhallefâtından olup medîne-i mezbûrede merhûm İslâm Bey mahallesinde vâki‘ bir tarafdan Şaban Bey b. Ali bağı ve bir tarafdan su mahzeni ve bir tarafdan merhûm Salih Paşa tarlası ve bir tarafdan tarîk-i âm ile mahdûd olup dâhiliyede ve hâricinde büyût-i adîdeyi ve bir kıt‘a bağı ve taş ma‘deni ve dört kıt‘a su kuyusunu ve kenîfleri müştemil mülk-i mevrûs menzilden bi tarîki’l-münâsahati’ş-şer‘iyye bana âid olan yüz on iki sehim hisse-i şer‘iyye-i ma‘hûdeyi müşârun-ileyh Osman Ağa’ya tarafeynden îcâb [ve] kabûlü hâvî bey‘-i bâtt-ı sahîh-i şer‘î ile bey‘ ve teslîm eyledim, ol dahi minvâl-i meşrûh üzre yüz altmış bin cedîd râyic fi’l-vakt akçeye iştirâ ve tesellüm ve kabz ve kabûl eyledikden sonra semen-i mezbûr yüz altmış bin akçeyi müşârun-ileyh Osman Ağa yedinden tamâmen ahz ü kabz eyledim ba‘de’l-yevm menzil-i mahdûd-ı mezkûrdan yüz kırk dört sehimden yüz on sehim hissede benim alâka ve medhalim yokdur, müşârun-ileyh Osman Ağa’nın mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î vâki‘ü’l-hâli Mevlânâ-yı mezbûr mahallinde ketb ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene sittîn ve sittîn ve elf. Şuhûdü’l-hâl: Abdürrahim Efendi b. Abdurrahman, Nakşî? Abdurrahman Efendi b. ( ) el-Kadı, Seyfullah Çelebi b. Ramazan, Şaban Ağa b. Hüseyin, Ali Çelebi b. el-Hâc Mehmed, Ahmed Çelebi b. Abdullah, Hasan Bey b. Abdullah, İbrahim Çelebi b. Kulu, Receb Efend[i] b. Abdi