Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 239 Hüküm no: 265 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabiha Hâtun bt. Hasan Efendi’nin mülk menzil arsasını oğlu Mustafa Çelebi’ye sattığı ve bedelini oğlundan satın aldığı câriyenin bedeli ile takas ettikleri Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım mahallesi sâkinlerinden umdetü’l-muhadderât Sabiha Hâtun bt. el-merhûm Hasan Efendi meclis-i şer‘-i şerîf-i lâzımü’t-teşrîfde sadrî kebîr oğlu fahrü’l-eşbâh Mustafa Çelebi b. Salih nâm şâbb-ı emred mahzarında tav‘an ikrâr ve i‘tirâf edip emlâkimden olup mahalle-i merkūmede vâki‘ bir tarafdan Şerîfezâde Hüseyin Efendi mülkü ve bir tarafdan vakıf menzil ve iki tarafdan tarîk-i âm ile mahdûd olup müşterek su kuyusunu ve zât-ı eşcâr-ı müsmire ve gayr-ı müsmire hadîkayı müştemil olan mülk menzil arsasını oğlum mezbûr Mustafa Çelebi’ye yüz kıt‘a riyâlî guruş-ı kebîre bey‘-i kat‘î ile bâtten bey‘ ve teslîm ol dahi vech-i mübeyyen üzre iştirâ ve kabûl ve kabz ve tesellüm eyledikden sonra semen-i mezbûru işbu uzun boylu açık kaşlı sarı elâ gözlü Rusiyyetü’l-asl hâzıratün bi’l-meclis Vildan bt. Abdullah nâm câriye semeninden zimmetimde lâzımü’l-edâ ve vâcibü’l-kazâ deynim olan yüz kıt‘a riyâlî guruş-ı kebîr hakkı ile takas oğlum mezbûr dahi mukāssa ve kabûl eyledi, ba‘de’l-yevm arsa-i merkūmede benim vechen mine’l-vücûhi’ş-şer‘iyye alâka ve medhalim yokdur oğlum mezbûr Mustafa Çelebi’nin mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Hüseyin Efendi b. Mehmed el-İmâm, Abdülbâkī Çelebi b. Hüseyin, Hüseyin Çelebi b. Mansur, Ahmed Çelebi b. Mehmed, Kasım Beşe b. Mehmed, Şaban Halîfe b. Ebîbekir, Rıdvan b. Abdullah, Ali Beşe b. Mustafa, Hüseyin b. Ali, Bayram Dede b. Mehmed ve gayruhüm mine’l-hâzırîn