Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 246 Hüküm no: 272 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Abdullah’ın mülk arsasının Ahmed Bey b. Yusuf’a satılması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Çavuş Kasım mahallesi sâkinlerinden Osman b. Abdullah nâm kimesne tarafından husûs-ı âti’z-zikri ikrâra vekîl olup Mehmed Çelebi b. Ahmed ve Ahmed Bey b. Haydar şehâdetleriyle şer‘an vekâleti sâbite olan Ömer Çelebi b. Mehmed nâm vekîl meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu kitâb-ı sıhhat-nisâbın sâhibi Ahmed Beşe b. Yusuf nâm râcil mahzarında bi’l-vekâle ikrâr-ı tâm ve ifâde-i merâm edip müvekkil-i mezbûr Osman silk-i mülkünde münselik olup mahalle-i mezbûrede vâki‘ bir tarafdan Fodulacı Mustafa mülkü ve bir tarafdan Hızır Beşe b. Haydar mülkü ve bir tarafdan Osman Beşe mülkü ve bir tarafdan ba‘zan mekābir-i müslimîn ve ba‘zan tarîk-i âm ile mahdûd ve mümtâz olan tûlen yetmiş ve arzan yetmiş dört zirâ‘ bi hesâb-ı satrancî beş bin seksen zirâ‘ mülk arsa-i hâliyesini mezbûr Ahmed Beşe’ye târih-i kitâbdan üç sene mukaddem üç bin cedîd akçeye bey‘-i kat‘î ile bey‘ ve kabz-ı semen ve teslîm-i mebî‘ etmişidi, hâlen zikr olunan arsa mezbûr Ahmed Beşe’nin mülk-i müşterâsı ve hakk-ı sırfıdır keyfemâ yeşâ ve hasbemâ yehtâr mutasarrıf olsun dedikde mukırr-ı mezbûr Ömer Çelebi’nin minvâl-i meşrûh üzre bi’l-vekâle cereyân eden ikrârını mezbûr Ahmed Beşe vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm min şuhûri sene sittîn ve sittîn ve elf. Şuhûdü’l-hâl: Eyüb Çelebi b. Süleyman, Ebîbekir Dede b. ( ) el-Müezzin, Mustafa Çelebi b. ( ) el-Attâr, Muslu Çelebi b. Receb, Mustafa Çelebi b. Rıdvan, el-Hâc Mahmud b. Mustafa, Dilâver Beşe b. Abdullah, Receb b. Abdi, Mehmed b. Mehmed