Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 244 Hüküm no: 271 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebussuûdzâde Mehmed Efendi’nin vârislerinden kızı Emetullah Hâtun’un mülk menzilden payına düşen hisseyi kardeşi Sadık Mehmed Efendi’ye sattığı Sâbıkan Rumeli kazaskeri iken cevâhir-i kadre intikāl eden merhûm Ebussuûdzâde Mehmed Efendi hazretlerinin verâseti halîlesi fahrü’l-muhadderât zahrü’l-muvakkarât tâcü’l-mestûrât Fâtımatü’z-zamân Âişetü’d-devrân Rukiye Hâtun bt. el-merhûm el-mebrûr ed-dâric ilâ medârici rahmeti rabbihi’l-gafûr Esad Efendi hazretleri ile necl-i mükerremleri a‘lemü’l-ulemâ[’i]’l-izâm [e]fdalü’l-fuzalâ[’i]’l-fihâm câmi‘u’l-fürû‘ ve’l-usûl hâvi’l-ma‘kūl yenbû‘ü’l-efâzıl zü’l-hubbi’t-tâhir ve’n-nesebi’l-bâhir vârisü’l-izzi ve’l-mecd kâbiren an kâbir Sadık Mehmed Efendi hazretlerine ve kerîme-i mükerremeleri umdetü’l-muhadderât zübdetü’l-muvakkarât Emetullah Hâtun’a münhasıra olduğu ve zikri câ’î hadîka beynlerinde kısmet olundukda tashîh-i mes’eleleri yirmi dört sehimden farz olunup sihâm-ı merkūmeden üç sehmin müşârun-ileyhâ Rukiye Hâtun ve on dört sehmin mûmâ-ileyh Sadık Mehmed Efendi hazretlerine isâbet eylediği şer‘an zâhir ve müte‘ayyin oldukdan sonra merkūme Emetullah Hâtun’un sadrî kebîr oğlu ve tarafından husûs-ı câ’i’z-zikri ikrâra vekîli olup müşârun-ileyhâyı ma‘rifet-i şer‘iyye ile ârifân olan fahrü’l-kuzât Ahmed Efendi b. Yahya ve diğer Ahmed Efendi b. Cafer şehâdetleriyle şer‘an vekâleti sâbite olan umdetü’l-müderrisîni’l-kirâm zübdetü’l-muhakkıkīni’l-fihâm Mehmed Efendi b. merhûm Ahmed Efendi meclis-i şer‘-i şerîf-i lâzımü’t-teşrîfde işbu sâhibü’l-kitâb mûmâ-ileyh Sadık Mehmed Efendi hazretleri taraf-ı şereflerinden dahi bey‘-i câ’i’z-zikre vekîl olup şâhidân-ı merkūmân şehâdetleriyle şer‘an vekâleti sâbite olan umdetü’l-emâcid ve’l-ekârim Receb Ağa b. Ali nâm vekîl muvâcehesinde bi’l-vekâle ikrâr ve i‘tirâf edip merhûm mûmâ-ileyh Mehmed Efendi hazretlerinin muhallefâtından olup Havâss-ı Kostantıniyye -hamâha’llâhu te‘âlâ ani’l-âfet ve’l-beliyye- kazâsına tâbi‘ kasaba-i Hasköy’de Sütlüce mahallesinde vâki‘ [bir] tarafdan Karaağaç Hadîkası demekle ma‘rûf mîrî bahçe ve bir tarafdan Halic-i bahr ve bir tarafdan Bâzirgânbaşı İsmail Çelebi bahçesi ve bir tarafdan tarîk-i âm ile mahdûd ve mümtâz olup dâhiliye ve hâriciyede büyût-i müte‘addideyi ve zât-ı eşcâr-ı müsmire ve gayr-ı müsmire hadîkayı ve mâ’-i cârîyi ve bir kıt‘a hamamı ve câmekânı ve bir mikdâr bağı müştemil olup Sütlüce Bahçesi demekle meşhûr olan mülk-i mevrûs menzilden irs-i şer‘le bana isâbet eden yedi sehim hisse-i şer‘iyye-i şâyi‘a-i mevrûsemi karındaşım müşârun-ileyh Sadık Mehmed Efendi hazretlerine tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin kıt‘a riyâlî guruş-ı kebîre bey‘ ve teslîm eylediğimde karındaşım müşârun-ileyh Sadık Mehmed Efendi hazretleri dahi minvâl-i mübeyyen üzre hisse-i ma‘hûdeyi iştirâ ve tesellüm ve kabz ve kabûl eyledikden sonra semen-i merkūm iki bin mezbûrü’l-vasf guruşu karındaşım mûmâ-ileyh Sadık Mehmed Efendi hazretleri yedinden ahz ü kabz eyledim, ba‘de’l-yevm menzil-i mahdûd-ı mezkûrdan yirmi dört sehimden yedi sehim hissede vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye benim alâka ve medhalim yokdur menzil-i mahdûd-ı mezkûrdan yirmi dört sehimden yirmi bir sehmi karındaşım müşârun-ileyh Sadık Mehmed Efendi hazretlerinin irsen ve şirâ’en mülk-i mahz-ı …? sarîhi olmuşdur keyfemâ yeşâ ve hasbemâ yehtâ[r] mutasarrıf olsun dedikde vekîl-i müşârun-ileyh Mehmed Efendi’nin vech-i meşrûh [üzre] cârî ve sâdır olan cemî‘ ikrâr ve i‘tirâf[ını] vekîl-i mersûm Receb Ağa bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sânî aşer mine’l-Muharremi’l-harâm min şuhûri sene sittîn ve sittîn ve elf. Şuhûdü’l-hâl: Umdetü’l-kuzâti’l-İslâm İbrahim Efendi b. Mehmed, fahrü’l-kuzât Mehmed Efendi b. Ahmed Efendi, umdetü’l-müderrisîn İbrahim Efendi b. el-merhûm Ali, Hasan Efendi b. Mehmed el-İmâm bi mahalle-i Nişâncı, es-Seyyid Ali Efendi b. es-Seyyid Mehmed el-İmâm, Ahmed Efendi b. Mehmed, Abdi Efendi el-Kadı, muharrirü’l-vesîka Mustafa Efendi b. Hasan, Mehmed Efendi b. Hüseyin el-Kadı, Mehmed Efendi b. Mustafa el-Kadı, Mehmed Ağa b. Habib el-Müteferrika, İbrahim Bey b. Mehmed, Mehmed Efendi b. Nasuh Ağa el-Kadı, Mehmed Efendi b. Habil ve gayruhüm mine’l-hâzırîn