Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 247 Hüküm no: 274 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Ağa’nın oğlu Mehmed’in vefat eden babası ile kardeşi Mustafa’dan kendisine miras kalan menzil hissesini Derviş Ağa b. Ali’ye sattığı Havâss-ı Kostantıniyye kazâsı ihtivâsından Büyük Çekmece nâhiyesine tâbi‘ Eskice nâm karyede çiftliği olup bundan akdem fevt olan Kurd Ağa nâm müteveffânın verâseti zevce-i metrûkesi Saliha bt. Abdullah nâm hâtun ile sulbî kebîr oğulları Mehmed ve Mustafa nâm kimesnelere ve sulbiye kebîre kızları Âişe ve Afîfe ve Fâtıma’ya münhasıra olduğu şer‘an zâhir ve müte‘ayyin oldukdan sonra mezbûr Mehmed meclis-i şer‘-i şerîf-i lâzımü’t-tevkīrde işbu sâhibü’l-kitâb umdetü’l-eşbâh Derviş Ağa b. Ali nâm kimesne muvâcehesinde ikrâr-ı tâm ve takrîr-i kelâm edip müteveffâ-yı mezbûrun muhallefâtından olup karye-i mersûmede vâki‘ lede’l-ahâlî ve’l-cîrân ma‘lûmü’l-hudûd ve’l-cevânib hâriciye ve dâhiliyede büyût-i adîdeyi ve iki kileri ve üç anbarı ve iki matbah ve bir hamam ve bir câmekânı ve üç ahırı ve bir harman yerini ve zât-ı eşcâr-ı müsmire ve gayr-ı müsmire hadîkayı ve bir kaç kenîfleri ve tahmînen dört dönüm bir kıt‘a mülk bağı müştemil mülk-i mevrûs menzilden babam müteveffâ-yı mezbûrdan ba‘dehû fevt olan karındaşım mezbûr Mustafa’dan irs-i şer‘le intikāl edip hisse-i şer‘iyye-i şâyi‘amı müşârun-ileyh Derviş Ağa’ya bey‘-i kat‘î ile yirmi beş bin cedîd akçe ile bir donluk iskarlata çukaya bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semen-i mezbûr yirmi beş bin akçe ile mezbûr çukayı yedinden tamâmen ahz ü kabz eyledim, ba‘de’l-yevm menzil-i mezkûrda olan hisse-i şer‘iyyemde benim vechen mine’l-vücûh alâka ve medhalim yokdur müşârun-ileyh Derviş Ağa’nın mülk-i müşterâsıdır keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ahmed Efendi b. Mehmed el-İmâm, Abdullah Efendi b. Mehmed el-İmâm, Şaban Efendi b. Mehmed el-Müderris, Hasan Çelebi b. Abdullah, Receb Efendi b. Mehmed, el-Hâc Mahmud Beşe b. Mustafa, Cafer Ağa b. Mehmed