Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 248 Hüküm no: 275 Orijinal metin no: [56a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Abdülbâki’nin Mehmed Çavuş b. Abdullah’a sattığı menzil bedelinden alacağı kaldığı Medîne-i Hazret-i Ebâ Eyyûb el-Ensârî -âmelehu’llâhu te‘âlâ bi lütfihi’l-Bârî-de Baba Haydar mahallesinde sâkine hâmil-i hâzihi’l-vesîka Meryem bt. Abdülbâkī nâm hâtun meclis-i şer‘-i şerîf-i lâzımü’t-tevkīrde Mehmed Çavuş b. Abdullah nâm kimesne muvâcehesinde üzerine takrîr-i da‘vâ ve bast-ı kelâm edip hudûdu ve müştemilâtı beynimizde ma‘lûm olan menzil semeninden merkūm Mehmed Çavuş zimmetinde elli iki [bin] cedîd akçe hakkım olup meblağ-ı mezbûrun on beş bin akçesini mukaddemâ yedinden ahz ü kabz edip semen-i bâkī otuz yedi bin akçeyi taleb eylediğimde merkūm Mehmed Çavuş meblağ-ı bâkī otuz yedi bin akçeyi def‘aten edâya iktidârı [56b] olmamağla târih-i kitâbdan iki yüz elli beş gün tamâmına değin te’cîl eyledim, suâl olunup ikrârı tahrîr olunmak matlûbumdur dedikde gıbbe’s-suâl mersûm Mehmed Çavuş cevâbında fi’l-hakīka vech-i muharrer üzre merkūme Meryem Hâtun’a zikr olunan menzil semeninden elli iki bin cedîd akçe deynim olup on beş bin akçesini yedine def‘ ve teslîm eylediğimden sonra semen-i bâkī otuz yedi bin akçeyi mezbûre Meryem Hâtun bana te’cîl ben dahi kabûl eyledim hâlen merkūme Meryem Hâtun’a târih-i kitâbdan iki yüz elli beş gün tamâmına değin müeccel ve mev‘ûd olmak üzre semen-i bâkī otuz yedi bin akçe zimmetimde lâzımü’l-edâ ve vâcibü’l-kazâ deynim vardır dedikde gıbbe’t-tasdîki’ş-şer‘î meblağ-ı müeccel-i merkūm otuz yedi bin akçeye mezbûre Meryem Hâtu[n] kefîl taleb eyledikde medîne-i Üsküdar’da Sofular mahallesi sâkinelerinden olup mukırr-ı merkūmun zevcesi Âişe Hâtun bt. Mustafa ve sulbiye kebîre kızı Fâtıma Hâtun meblağ-ı müeccel-i mezbûr otuz yedi bin akçeye her biri emr ve kabûlü hâvî kefâlet-i şer‘iyye ile [kefîl] bi’l-mâl olduk dediklerinde ba‘de’t-tasdîki’l-mu‘teber mâ hüve’l-vâki‘ gıbbe’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene sittîn ve sittîn ve elf. Şuhûdü’l-hâl: Mehmed Efendi b. Ramazan, Mehmed Efendi b. Mustafa, Mehmed Bey b. Mustafa, Mehmed Çelebi b. Hüsrev, Ahmed Çelebi [b.] Mahmud