Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 268 Hüküm no: 303 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin Perviz Efendi Vakfı’ndan borç aldığı Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ merhûm Perviz Efendi Vakfı’na bi’l-fi‘il mütevellî olan işbu râfi‘ü’l-kitâb Mehmed Çelebi b. İbrahim el-mütevellî muvâcehesinde tevliyeti hasebiyle üzerine da‘vâ ve takrîr-i kelâm edip mezbûr Mehmed Beşe zimmetinde mâl-ı vakf-ı mezbûrdan iki bin dokuz yüz altmış akçe olup hâlen taleb eylediğimde edâdan imtinâ‘ eder suâl olunsun [dedikde] gıbbe’s-suâl ve akībe’l-inkâr mütevellî-i mezbûrdan müdde‘âsını mübeyyine beyyine taleb olundukda udûl-i ricâlden olup medîne-i mezbûrede Câmi‘-i kebîr mahallesi sükkânından Mehmed Çelebi b. Abdülmennân ve Aşçıbaşı mahallesi sâkinlerinden Mustafa Çelebi b. İsmail nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed Beşe vakf-ı mezbûra meblağ-ı merkūm iki bin dokuz yüz altmış cedîd akçe zimmetimde lâzımü’l-edâ ve vâcib[ü’l-]kazâ deynim vardır deyû huzûrumuzda bi tav‘ihî ikrâr ve bizi işhâd etmişidi, biz bu husûsa minvâl-i mübeyyen üzre ikrârına şâhidleriz şehâ[det] dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle ve mesmû‘a olmağın mûcebiyle ba‘de’l-hükm mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ aşer min Saferi’l-hayr li sene sittîn ve sittîn ve elf. Şuhûdü’l-hâl: Ahmed Efendi b. Ali, Ahmed Çelebi b. Mehmed, Mehmed Çelebi b. Mustafa, Receb Efendi b. Abdi