Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 267 Hüküm no: 302 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arpa emîni Mehmed Efendi’nin Çakal Deresi’ndeki kuyulardan çıkardığı suyu yaptırdığı çeşmeye ve evine akıtması ile ilgili keşif yapıldığı [Derkenâr] Arpa emîni Mehmed Efendi suyudur ve çeşmesine Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Şeyh Baba Haydar mahallesi sâkinlerinden işbu sâhibü’l-kitâbi’l-müstetâb iftihârü’l-emâcid ve’l-ekârim câmi‘u’l-mehâmid ve’l-mekârim zü’l-kadri’r-refî‘ ve’l-câhi’l-menî‘hâlen mîrî arpa emîni Mehmed Efendi b. Abdülmennân meclis-i şer‘-i şerîfde takrîr-i kelâm ve ta‘bîr ani’l-merâm edip mahalle-i mezbûrede vâki‘ menzilimde ve menzil-i merkūma muttasıl olup vakfiyyet üzre mukaddemâ râh-ı Hüdâ’da binâ eylediğim çeşmede cârî olmak üzre Havâss-ı Kostantıniyye kazâsı nevâhîsinden Terkos nâhiyesine tâbi‘ bahçe-i Belgrad demekle ma‘rûfe karye sınırı dâhilinde Çakal Deresi nâm mevzi‘de âbâr-ı müteferrika hafr ettirmişidim, hâlen ol âbârdan cem‘ ve tahsîl olunan miyâhın kıbel-i şer‘-i şerîfden üzerine varılıp erbâb-ı miyâh beynlerinde mu‘tâd olan tarz-ı ma‘rûf ve semt-i me’lûf üzre alâ vechi’l-mu‘tâd ve neski’l-i‘tiyâd vezn ve ayâr ve tahmîn-i sahîh-i şer‘î ile tahmîn ve ta‘yîn olunmak matlûbumdur dedikde cânib-i şer‘-i mutahhardan fahrü’l-müderrisîn Ahmed Efendi irsâl olunup ol dahi hâssa suyolu nâzırı fahrü’l-ekârim Ali Ağa b. Yunus ve bölükbaşıları el-Hâc İbrahim b. Sefer ve el-Hâc Mehmed b. Mahmud ve zeyl-i kitâbda mastûretü’l-esâmî bî-garaz müslimîn ile bâlâda zikr olunan mevzi‘de cem‘ ve tahsîl olunan miyâhın üzerine varıp keşf ve müşâhede olundukdan sonra erbâb-ı miyâh cem‘ olunan mâ’ı alâ vechi’l-mu‘tâd vezn ve ayâr eylediklerinde kâmil üç masura su cârî oldukda ol mevzi‘e karîb merhûme Vâlide Sultan hazretlerinin vakıf suyu olmağla âna üç masura su ilhâk olunup andan Iskara ta‘bîr olunur mahalde vâki‘ suya andan Kırk Çeşme suyuna mütevellîleri izniyle idrâc olunmağın bir masurası âdet-i kadîme üzre hakk-ı mecrâ alıkonuldukdan sonra bâkī iki masura suyu müşârun-ileyh Mehmed Efendi murâd eylediği mahalden ifrâz eyledikden sonra bir masura suyu zikr olunan çeşmeye icrâ edip ve bir masura suyu dahi menzil-i mezbûrda vâki‘ mülk hadîkalarında icrâ etmek üzre erbâb-ı miyâh ve sâir vukūf ve su‘ûdu olan bî-garaz müslimîn vezn-i sahîh ile vezn ve ayâr ve tahmîn-i sarîh ile tahmîn ve ta‘yîn eylediklerin Mevlânâ-yı müşârun-ileyh mahallinde ketb ü tahrîr ba‘dehû meclis-i şer‘a gelip [48a] alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe min şuhûri sene hamsin ve sittîn ve elf. Şuhûdü’l-hâl: Umdetü’l-kuzât Davud Efendi b. Ahmed, Mehmed Ağa b. İbrahim, es-Seyyid İbrahim Efendi, Kurd Ali Bey b. Mehmed el-Cündî, Mehmed Çelebi b. Davud Efendi, Mehmed Beşe b. Hüseyin, Kenan Bey b. Abdullah, Şaban Bey b. Ali, Hüseyin Bey b. Mehmed, Ali Beşe b. Muslu, Nasuh b. Yusuf, Muslu b. Ali ve gayruhüm