Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 269 Hüküm no: 305 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Süleyman’ın vakıf menzildeki süknâ hakkını bedeli karşılığında kardeşi Hüseyin Beşe’ye devrettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm İslâm Bey mahallesi sâkinlerinden Hasan Beşe b. Süleyman meclis-i şerî’at-i şerîfede karındaşı işbu râfi‘ü’l-kitâb Hüseyin Beşe nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan İslâm Çelebi b. ( ) mülkü ve bir tarafdan Ali Çelebi b. Mahmud mülkü ve bir tarafdan merhûm Ahmed Ağa veresesi mülkleri ve bir tarafdan tarîk-i âm ile mahdûd ve mümtâz olup fevkānî ve tahtânî iki bâb odaları ve bir sundurmaya muttasıl havluyu ve kenîfi müştemil olan menzil merhûme ( ) nâm sâhibetü’l-hayrât vakfı olup süknâsı karındaşım mezbûr ile ale’ş-şeriketi’s-seviy meşrûta olmağla hâlen menzil-i mahdûd-ı mezkûrda olan hakk-ı süknâmı karındaşım mezbûr Hüseyin Beşe’ye altı bin akçe bedel mukābelesinde ferağ ve tefvîz eylediğimde ol dahi vech-i mübeyyen üzre tefevvuz ve kabûl eyledikden sonra hakk-ı ferağ olan meblağ-ı mezbûr altı bin akçeyi karındaşım mezbûr Hüseyin Beşe yedinden tamâmen alıp kabz eyledim ba‘de’l-yevm menzil-i mahdûd-ı mezkûrun süknâsında benim vechen mine’l-vücûh alâka ve medhalim yokdur karındaşım mezbûr Hüseyin Beşe’nin dâhil-i taht-ı tasarrufu olmuşdur min ba‘d mecmû‘-ı menzil-i mezbûra meşrûtiyet üzre keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fî evâhiri Saferi’l-hayr min şuhûri sene sittîn ve sittîn ve elf. Şuhûdü’l-hâl: Ahmed Efendi b. Mehmed el-İmâm, Ahmed Bey b. Mahmud, Mehmed Ağa b. Hüseyin, Süleyman Çelebi b. Hüseyin, Mustafa Beşe b. Hüseyin, Ali b. Mustafa, Hüseyin b. (...) Bayram b. Mehmed, Abdi b. İskender, Mustafa b. Mahmud ve gayruhüm