Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 269 Hüküm no: 306 Orijinal metin no: [62a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Hüseyin’in mülk menzili ile bağını Mehmed b. İsmail’e bey‘ bi’l-istiğlâl yoluyla sattığı Havâss-ı Kostantıniyye kazâsına tâbi‘ Terkos nâhiyesi ihtivâsından Bosna nâm karyede sâkin Hasan Beşe b. Hüseyin nâm kimesne meclis-i şer‘-i şerîfde bundan akdem fevt olan İsmail nâm müteveffânın sulbî oğlu Mehmed nâm sagīrin tesviye-i umûruna kıbel-i şer‘-i kavîmden mansûbe vasîsi ve sagīr-i mezbûrun vâlidesi râfi‘at-i hâzihi’l-vesîka İsmihân Hâtun bt. Osman tarafından husûs-ı câ’i’z-zikri tasdîke vekîli olup mezbûreyi ma‘rifet-i şer‘iyye ile ârifân olan Ömer Çelebi b. Mehmed ve Mustafa Çelebi b. Ali şehâdetleri ile şer‘an vekâleti sâbite olan Mehmed Bey b. Abdi nâm kimesne muvâcehesinde ikrâr ve i‘tirâf edip silk-i mülk-i sahîhinde münselik olup karye-i merkūmede vâki‘ cevânib-i erba‘ası tarîk-i âm [62b] ile mahdûd ve mümtâz olan mülk menzilim ile menzil-i mahdûd-ı mezkûr kurbunda vâki‘ lede’l-cîrân ma‘lûmetü’l-hudûd bir kıt‘a mülk bağımı müvekkile-i merkūmeye bi tarîki’l-istiğlâl yirmi bin cedîd akçeye bey‘ ve teslîm ol dahi sagīr-i mezbûr mâlıyla vech-i mübeyyen üzre iştirâ ve tesellüm ve kabz ve kabûl eyleyip semeni olan meblağ-ı mezbûru müvekkile-i merkūme yedinden tamâmen ahz ü kabz eylediğimden sonra yine menzil-i mezbûru ba‘de’t-tahliyeti’ş-şer‘iyye müvekkile-i merkūma târih-i kitâb şehri gurresinden üç sene tamâmına değin beher sene üçer bin akçeden sinîn-i mezbûrede cem‘an dokuz bin akçe ücret ile bana îcâr ve teslîm ben dahi vech-i muharrer üzre istîcâr ve tesellüm ve kabz ve kabûl eyledim dedikde mukırr-ı mezbûrun minvâl-i meşrûh üzre cârî ve sâdır olan cemî‘ ikrârını vekîl-i mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Mustafa Çelebi b. Mehmed, Hüseyin Halîfe b. Şaban, Ramazan Bey b. Yusuf, Mahmud Beşe b. Mehmed, Veli Çelebi b. İsa, Mahmud Beşe b. ( ) çukadâr, Mustafa Çelebi b. Ali, Mustafa Çelebi b. Mehmed, Ali Beşe b. Mustafa, Hüseyin b. Ali ve gayr