Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 279 Hüküm no: 308 Orijinal metin no: [39b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Eyüb Halife’nin bîmarhâne için vakfedilen paradan aldığı borcunun terekesinden tahsil edilmesi Efendi imzâsıyladır. Mahmiye-i İstanbul’da Hadîka-i sultâniye’de vâki‘ olup hâssa bostancılara mahsûs olan bîmârhâne mühimmâtiyçün mevkūfe nukūdun bi’l-fi‘l mütevellîsi olan işbu râfi‘ü’l-kitâb Eyüb Halîfe b. Mehmed nâm kimesne meclis-i şer‘-i şerîf-i lâzımü’t-teşrîfde hâssa kalaycılardan olup mahmiye-i mezbûrede Hocapaşa mahallesi ahâlîsinde iken bundan akdem medîne-i Edirne’de vefât eden Eyüb Halîfe b. ( ) zevce-i metrûkesi Âişe bt. ( ) nâm hâtundan gayrı vârisi olmayıp hâssa tabbâhlar beytülmâli emîni olmağla müteveffâ-yı mezbûrun terekesinin selâse-i erbâ‘ını beytülmâl için kabz eden Ramazan Ağa b. Şaban mahzarında üzerine da‘vâ ve takrîr-i kelâm edip yedimde olan mâl-ı vakf-ı mezbûrdan yüz altmış kıt‘a riyâlî guruşu müteveffâ-yı mezbûra hayâtında ikrâz ve teslîm ve bir kılıcı dahi yirmi dört riyâlî guruşa bey‘ ve teslîm ol dahi iktirâz ve iştirâ ve tesellüm edip meblağ-ı mezbûr ile semen-i mezkûru kable’l-edâ vefât etmekle zimmetinde kalmış idi suâl olunup tereke-i vâfiyesinden alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda hâssa bostancılardan Ali Bey b. Mustafa ve Mehmed Bey b. Nasuh nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr yedinde olan mâl-ı mezkûrdan yüz altmış riyâlî guruşu huzûrumuzda müteveffâ-yı mezbûra hayâtında ikrâz ve teslîm ve bir kılıcı dahi yirmi dört riyâlî guruşa bey‘ ve teslîm müteveffâ-yı mezbûr dahi iktirâz ve iştirâ ve tesellüm etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı mezbûr yüz altmış riyâlî guruş ile semen-i mezbûru müteveffâ-yı mezbûrun tereke-i vâfiyesinden müdde‘î-i mezbûra edâya mezbûr Ramazan Ağa’ya ba‘de’t-tenbîh mâ vaka‘a bi’t-taleb ketb olundu. Fi’l-yevmi’s-sâbi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Fahrü’l-akrân Mehmed Çelebi Kethüdâ-yı muhzırân, Şükrullah Bey b. Mustafa, Abdi Çelebi b. Hüseyin, Mustafa Çelebi b. el-Hâc Ahmed, İbrahim Çelebi b. Ahmed ve gayruhüm mine’l-hâzırîn.