Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 279 Hüküm no: 307 Orijinal metin no: [39b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polo v. İlya’nın elini bıçakla yaralayan Dilâver Bey ile olan davada sulh olduğu Uncu tâifesinden Polo v. İlya nâm zimmî meclis-i şer‘-i şerîf-i lâzımü’t-teşrîfde bâ‘isü’l-kitâb Dilâver Bey b. Abdullah nâm kimesne mahzarında ikrâr ve takrîr-i kelâm edip mezbûr Dilâver Bey târih-i kitâb günü mahmiye-i İstanbul’da Tavukpazarı kurbunda vâki‘ dükkânım önünde bir ak kabzalı bıçak ile sol elimin üstünü vurup mecrûh etmekle mezbûr Dilâver Bey’den bundan akdem mûceb-i şer‘îsini da‘vâ eylediğimde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip husûs-ı mezbûra da‘vâsından merkūm Dilâver Bey ile beynimizde dört yüz akçe üzerine inşâ-i akd-i sulh eylediklerinde ben dahi sulh-i mezbûru ve bedel-i sulh olan meblağ-ı mezkûr dört yüz akçeyi merkūm Dilâver Bey yedinden alıp kabz edip husûs-ı mezbûra müte‘allika da‘vâdan merkūm Dilâver Bey’i ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Ramazan Bey b. Mehmed, Ahmed Bey b. Mehmed, Mustafa Efendi, Halil b. Mehmed ve gayruhüm.