Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 291 Hüküm no: 338 Orijinal metin no: [69a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçerilerden Hüseyin Beşe’nin kızı Ezmerağda’ya mülk menzili ile harman yerini sattığı, tasarrufundaki on tarlanın tasarruf hakkını devrettiği Vilâyet-i Rumeli’nde Ergirikasrı kazâsına tâbi‘ Venişte nâm karyeden olup hâlen Dergâh-ı âlî yeniçerilerinden olan Hüseyin Beşe b. Abdullah nâm kimesne meclis-i şer‘-i şerîf-i ezherde sulbiye kebîre kızı işbu bâ‘isetü’l-kitâb Ezmerağda nâm nasrâniye tarafından ikrâr-ı âti’z-zikri tasdîke vekîl olup bimâ hüve nehcü’s-sübût şer‘an vekâleti sâbite olan Nani v. Nikola nâm zimmî muvâcehesinde bi tav‘ihî ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Yani v. Duka mülkü ve bir tarafdan diğer Yani v. Kondi mülkü ve bir tarafdan Kaso v. Kondi mülkü ve bir tarafdan tarîk-i âm ile mahdûd bir bâb tahtânî odayı ve anbarı ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘iyle ve yine menzil-i mezbûr kurbunda vâki‘ bir tarafdan harman yerimi kızım müvekkil-i merkūmeye bin cedîd akçeye bey‘-i kat‘î ile bey‘ edip ol dahi vech-i mübeyyen üzre iştirâ ve kabûl eyledikden sonra yine karye-i merkūme sınırı dâhilinde mevâzi‘-i müteferrikada vâki‘ her birinin hudûdu beynimizde ma‘lûm on kıt‘a tarlamın dahi hakk-ı tasarruflarını ma‘rifet-i sâhib-i arz ile mezbû[re] Ezmerağda’ya iki bin [akçe] bedel mukābelesinde tefvîz eyledim eylediğimde ol dahi tefevvuz ve kabûl eyleyip semen-i mezbûr ile bedel-i mezkûr ki cem‘an üç bin akçe deyne kızım müvekkile-i merkūme Ezmerağda’nın zimmetini ibrâ ve iskāt eyledim min ba‘d zikr olunan menzi[l] ve harman yeri ve tarlalarda benim alâka ve medhalim yokdur her birini mahallinde zabt ve tasarrufa kızım müvekkile-i merkūmeyi tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene sittîn ve sittîn ve elf. Şuhûdü’l-hâl: Abdullah Beşe b. İskender, Ali Beşe b. Mustafa, Dilâver Beşe b. Abdullah, Yusuf [b.] Keyvan