Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 290 Hüküm no: 337 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baba Ali Tekkesi zâviyedârlığının talebi üzerine vâkıfın evlâdından olan Hatice Hâtun’a verilmesi ve haksız yere zabt eden Mustafa’nın men edilmesi Haslar kazâsında İdris Köşkü kurbunda vâki‘ merhûm Baba Ali Tekyesi’nde evlâd-ı vâkıfdan olup vazîfe-i mu‘ayyenesiyle meşrûtiyet üzre zâviyedâr olan râfi‘a-i tevkī‘-i refî‘ü’ş-şân-ı hâkānî Hatice Hâtun -zîdet ismetuhâ- zikr olunan zâviye hakk-ı meşrûtası olup üzerimde iken âhardan Mustafa nâm kimesne zâviye-i mezkûru fuzûlî zabt edip gadr eylemekle mezbûr Mustafa ref‘ olunup geri kendiye ibkā ve mukarrer kılınıp berât-ı âlîşân verilmek bâbında inâyet ricâ eylemeğin bu bâbda inâyet ricâ eylemeğin hakkında mezîd-i inâyet-i pâdişâhânem vücûda getirip ru’ûs-ı hümâyûnum sûreti mûcebince bin altmış beş Zilhiccesinin ikinci gününden ibkā ve mukarrer kılınıp berât-ı hümâyûnu verdim ve buyurdum ki mezbûre Hatice Hâtun varıp ber mûceb-i şart-ı vâkıf meşrûtiyet üzre kemâkân zâviyedâr olup hizmet-i lâzımesin mer‘î ve mü’eddâ kıldıkdan sonra vazîfe-i mu‘ayyenesin evkāf-ı mezbûr mahsûlünden olup mutasarrıfe ola ve zâviye-i mezbûr[e] hakk-ı meşrûtası olmağla min ba‘d ref‘ olan mezbûr Mustafa ve âhardan bir ferdi dahl ve ta‘arruz kılmayıp mâni‘ ve müzâhim olmaya şöyle bileler alâmet-i şerîfime i‘timâd kılalar. Tahrîren fi’l-yevmi’s-sâdis min şehri Zilhicce sene hamsin ve sittîn ve elf. Be makām-ı Kostantıniyyetü’l-mahrûse Vasale ileynâ fi’l-yevmi’s-sâbi‘ aşer min Zilhicceti’ş-şerîfe li sene hamsin ve sittîn ve elf.