Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 281 Hüküm no: 310 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Bâli’nin evinde kiracı olarak kalan Âişe’nin kaçması üzerine, eşyalarının yazılıp emanete verildiği ve evin sahibine iade edildiği Mahmiye-i İstanbul’da Fîruz Ağa mahallesi sâkinlerinden el-Hâc Bâli nâm kimesne meclis-i şer‘de takrîr-i kelâm edip mahalle-i mezbûrede vâki‘ ma‘lûmü’l-hudûd mülk menzilimin müste’ciresi olan Âişe bt. ( ) nâm hâtun firâr edip menzil-i mezbûr hâlî ve mu‘attal kalıp kıbel-i şer‘den üzerine varılıp mezbûre Âişe’nin menzil-i mezbûr içinde mevcûd olan eşyâsı tahrîr ve bir mu‘temedün-aleyh kimesneye emânet vaz‘ olunup menzil-i mezbûr[un] bana teslîm olunması murâdımdır deyip bu husûs için yedinde buyruldu-yı şerîf dahi olmağın kıbel-i şer‘den Mehmed Efendi b. Mustafa irsâl olunup ol dahi menzil-i mezbûrun üzerine varıp zeyl-i rakīmde muharrerü’l-esâmî olan müslimîn huzûrunda menzil-i mezbûr açılıp ba‘de’l-keşf ve’n-nazar içinde bir beledî döşek ve dört köhne minder ve beş beledî yastık ve iki köhne yorgan ve bir köhne kilim ve bir köhne sandık içinde bir köhne çini tabak ve dört yoğurt çanağı ve bir köhne ağaç sini ve bir ağaç tekne ve iki tennûr ve bir öreke ve bir elek ve dört köhne kutu ve iki desti ve iki toprak tencere ve bir çeki odun bulunmağla eşyâ-i mezbûreyi mezkûr el-Hâc Bâli’ye emânet vaz‘ ve teslîm edip ol dahi eşyâ-i mezbûreyi ahz u kabz ve tesellüm eyledikden sonra menzil-i mezbûr mutasarrıfına teslîm olunup vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Ali ile meclis-i şer‘a gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Halil Efendi el-İmâm, Hüseyin Çelebi el-Müezzin, el-Hâc İlyas el-Müezzin, el-Hâc Ahmed b. Mehmed, Abdi Çelebi b. Ali, Mehmed Çelebi b. Osman.