Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 281 Hüküm no: 311 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muammer bt. Abdullah’ın, Kasım b. Mehmed’den muhâlaa yoluyla boşandığı Mahmiye-i İstanbul’da Akbıyık mahallesinde sâkine Muammer bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb zevci Kasım b. Mehmed nâm kimesne mahzarında ikrâr ve takrîr-i kelâm edip zevcim mezbûr Kasım zimmetinde mütekarrir ve ma‘kūdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre ve nafaka-i mefrûza-i müstedânemden zevcim merkūm zimmetinde müctemi‘ olan dört bin akçeden dahi fâriğa olup bedel-i hul‘ olmak üzre zevcim merkūm Kasım ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete ve gayra müte‘allika âmme-i de‘âvâdan her birimiz âharın zimmetini ibrâ ve iskāt eyledik dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: El-Hâc Süleyman b. Mahmud, Mehmed b. Abdülmennân, Ali b. Mehmed, Mehmed b. Musli, Hasan b. Ahmed, Mehmed Çelebi Kethüdâ-yı muhzırân, Edhem Çelebi b. Ahmed, Hasan Çelebi b. Ahmed.