Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 294 Hüküm no: 343 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vâkıfın şartına aykırı olarak Baba Ali Tekkesi zâviyedârı olan Mustafa’nın görevden alındığı ve yerine vâkıfın evlâdından Hatice Hâtun’un zâviyedâr olduğuna dâir berât İşbu râfi‘-i tevkī‘-i sa‘âdet-nişân evlâd-ı vâkıfdan olan kıdvetü’l-muhadderât Hatice Hâtun -zîdet gufrânühâ- hakkında mezîd-i inâyet-i Pâdişâhânem zuhûra getirip Haslar kazâsına tâbi‘ İdris Köşkü nâm mevzi‘ kurbunda vâki‘ merhûm Baba Ali zâviyesi ber mûceb-i şart-ı vâkıf akzâ kuzâti’l-müslimîn Haslar kadısı olan Mevlânâ Mehmed -zîdet fezâilühû- arzı mûcebince hilâf-ı şart-ı vâkıf olup gadr etmeğin vakfiyeye nazar olunup evlâda meşrûta idiği zâhir olmağla ber mûceb-i şart-ı vâkıf ref‘ olunan Mustafa yerine bin altmış beş Ramazân-ı şerîfin yirminci gününden zâviyedâr nasb ve ta‘yîn edip bu berât-ı hümâyûnu verdim ve buyurdum ki merkūme Hatice Hâtun varıp zâviye-i mezbûreye ber mûceb-i şart-ı vâkıf zâviyedâr olup bundan akdem zâviyedâr olanlar ne vechile zabt ve tasarruf edegelmişler ise merkūm dahi ol minvâl üzre mutasarrıf ola ol bâbda ref‘ olunan mezbûr Mustafa ve taraf-ı âhardan bir ferd mâni‘ ve dâfi‘ ve dahl ve ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’l-ışrîn Ramazânü’l-mübârek li sene hamsin ve sittîn ve elf. Be makām-ı Kostantıniyyetü’l-mahrûse Vasale fi’l-yevmi’l-hâmis ve’l-ışrîn mine’ş-şehri’l-mezbûr li’s-seneti’l-merkūme.