Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 127 Hüküm no: 146 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ordunun ihtiyacı olan topların nakli için gerekli olan asker kayıtlarının yenilenip ihtiyaçlarının ve yol güvenliğinin sağlanması İftihârü’l-kuzât ve’l-hükkâm me‘âdinü’l-fezâil ve’l-kelâm Kalecik ve Kastamonu ve Çerkeş ve Çorum [ve] Boyabad ve Gerede kādıları -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyet [ve] iş erleri -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki top arabacılar[ı] ocağından ordu-yı hümâyûna irsâl olunacak Şâhî top arabaları koşumları içün kadr-ı kifâye iktizâ eden top arabacı neferâtının müceddeden tashîh olunmaları muktezî olmağla neferât-ı merkūmenin tahrîr olundukları mahâllerden ordu-yı hümâyûna gelince esnâ-i râhda mürûr ve nüzûl edecekleri menâzilde îcâb eden bahası ve ücretleri tekâlîflerine takās olunmak şartıyla mevcûdlarına göre her bir neferine yevmî birer çift nân ve her altı neferine bir vakiye güşt ta‘yînâtları ile eşyâların tahmîli içün her on neferine bir re’s mekkârî bargiri kazâ ahâlîleri taraflarından verilmek fermânım olmağın imdi siz ki kuzât ve sâirleri mûmâ-ileyhimsiz neferât-ı merkūme tahrîr olundukları mahâlden ordu-yı hümâyûna gelince esnâ-i tarîkde her kangınız taht-ı kazâsına varup dâhil olur ise mevcûdlarına göre her bir neferine yevmî bir çift nân ve her altı neferine bir vakiye güşt ve ta‘yînâtları ile eşyâları tahmîli içün beher on neferine bir re’s mekkârî bargiri ahâlî-i kazâ taraflarından tedârük olunup <> taraflarına teslîm ve kabûllerini müş‘ir mikdârı defterleri tasrîhiyle zâbit yedlerinden memhûr temessükât ahz ve baha ücretleri tekâlîflerinden takās olunmak üzere ahâlî-i kazânın yedlerinde hıfz etdirdüp neferât-ı mezbûrenin ta‘yînâtları husûsuna zarûret ve müzâyaka çekdirilmemeye be-gāyet ihtirâz ve ictinâb eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-imtisâlimin lâzım gelen mazmûn-ı itâ‘at-makrûnu ile âmil olup hilâfıyla vaz‘ u hareketden be-gāyet ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis Şevvâli’l-mükerrem sene [1]182 Fermân-ı emr-i celîlü’ş-şân mantûkunca Kalecik Ağası Hasan Çorbacı Ağa mevcûd neferâtına Kartal’a dâhil oldukda sûret-i emr-i âlîşâna bâlâda mezkûr emr-i üslûb üzere olmağla bu mahâlle şerh.