Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 128 Hüküm no: 147 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgo v. Hıristodolos’un bağını Papa İsayi’ye sattığı Ada-i kebîr’de Papa Esayi’nin mübâya‘a hüccetidir. Pendik karyesinde mütemekkin Yorgo v. Hıristodolos zimmî meclis-i şer‘-i hatîrde işbu râfi‘ü’r-rakīm Papa İsayi v. Yani tarafından ber-vech-i âtî tasdîka vekîli Ancelo v. Todori muvâcehesinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup karye-i mezbûre toprağında Kolfan? kurbünde vâki‘ bir tarafı Hamartoz bağı ve bir tarafı Bahçıvanoğulları bağı ve bir tarafı Sarı Latoz? veresesi bağı ve bir tarafı tarîk-i âm ile mahdûd tahmînen üç dönüm kürûmî mülk vişne eşcârlı bir kıt‘a yerli bağımı müşterî-i mesfûra bey‘-i bâtt-ı sahîh-i şer‘î ile altmış guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl edüp meblağ-ı semen-i mezkûr altmış guruşu yedinden bi’t-tamâm ve’l-kemâl ahz ü kabz eyleyüp bağ-ı mahdûd-ı mezkûrun gabn ü tağrîrine müte‘allıka âmme-i da‘vâdan müşterî-i mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâ-ba‘d zikri mürûr eden bağda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşterî-i mezbûrun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Zilhicceti’ş-şerîfe li-sene isnâ ve semânîn ve mi’ete ve elf. Şuhûdü’l-hâl: Kayseriyeli Mehmed Beşe, Nalband İbrahim Ağa, Ahmed Efendi, Hüseyin Beşe b. Mehmed, Kahveci Bekir Beşe b. Hüseyin. Andon v. İlya ve İlya v. Atale?, Aci Londeri v. Vasilaki?, ve Nikovilo v. ...? Uskolye v. Zakari, Uncu Kirkor v. Palaş, Yamandi v. Panayot, Andon v. Esteryos, Manolaki v. Dimitraki ve gayruhum.