Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 53 Hüküm no: 10 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kulfallu köyünün Silivri’den ayrılarak Terkos’a bağlanıp avârızlarının oradan alınması Battâl Kulfallu karyesi ahâlîsi Akzâ kuzâti’l-müslimîn evlâ vülâtü’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki Hazîne-i âmiremde mahfûz olan mevkūfât defterlerinde nısf avârız hânesi olan Kulfallu nâm karye ahâlîsi Dîvân-ı hümâyûnuma gelip bundan akdem Terkos nâhiyesinde iken Silivri nâhiyesin ilhâk olup gadr olmağla Terkos nâhiyesi karîb olup geri nâhiye-i merkūmeye ilhâk olunmak bâbında inâyet recâ eyledikleri ecilden geri Terkos’a ilhâk olunduklarına Hazîne-i âmiremden mühürlü ve nişânlı mevkūfât defteri sûreti verilmeğin mûcebince amel olunmak fermânım olmuşdur. Buyurdum ki hükm-i şerîfim vardıkda bu bâbda Hazîne-i âmiremden ihrâc olunup karye-i mezbûre ahâlîsinin ellerine verilen mühürlü ve nişânlı mevkūfât defteri sûreti mûcebince fîmâ ba‘d vâki‘ olan avârız ve sâir tekâlîflerin ilhâk olundukları üzre Terkos nâhiyesi ahâlîsi ile edâ ettirip Silivri nâhiyesi tarafından tekrâr hilâf-ı defter müdâhale ve rencîde ettirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâbi‘ ve’l-ışrîn min Zi’l(…) [Zilka‘deti’ş-şerîf li sene isneteyn ve seb‘în ve elf]. Vasale ileynâ fî 18 min Zilhicceti’l-harâm li sene isneteyn ve seb‘în ve elf. Yazıla Kazâ-i hâshâ-i İstanbul resm-i hânehâ-i avârız-ı karye-i mezbûre ber mûceb-i defter-i Hazîne-i âmire. Sah, Karye-i Kulfallu der nâhiye-i Terkos, sah. Hâne nısf 0,5 Yalnız buçuk hânedir. Bâz ilhâk şüd bi nâhiye-i Terkos an nâhiye-i Silivri ber mûceb-i arzuhâl-i ahâlî-i karye-i mezbûre bâ fermân-ı âlî el-vâki‘ fî 16 Z[ilhicce] sene 1072. Hâne nısf 0,5. Karye-i mezbûre bundan akdem Terkos’da iken Silivri nâhiyesine ilhâk olunup hâliyâ ahâlîsi Dîvân-ı hümâyûna gelip bize gadr olunmuşdur deyû izhâr-ı tazallüm edip yine Terkos nâhiyesine ilhâk olunmak bâbında inâyet recâ etmeğin karye-i mezbûre Terkos nâhiyesi akreb olmağla karye-i Kulfallu el-evvel Terkos’a ilhâk oluna deyû fermân-ı âlî sâdır olmağın mûcebince mahalline kayd olunup sûretidir ki mevkūfâtdan nakl olundu. Fî 16 min Zâ [Zilka‘de] sene 1072. Vasale ileynâ fî 19 min Zilhicceti’ş-şerîfe sene 1072. [Pençe]