Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 52 Hüküm no: 9 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vidin, Boğdan ve Eflak’tan gelen koyunların Karababa adlı yerde ağıla konularak vergilerinin alınması Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki bin yetmiş iki senesinde Yedikule’de vâki‘ bâc-ı pây ağnâmı ve tevâbi‘i mukāta‘ası emîni olan Yamandi nâm zimmî hâlâ Dersa‘âdet’ime arzuhâl edip kadîmden bu âna dek vilâyet-i Rumeli’nde Vidin ve Boğdan ve Eflak câniblerinden gelen koyun kazâ-i mezbûrda vâki‘ Karababa [nâm] mahalde ağıl olup ve koyunları emîn ma‘rifetiyle ağıla konulup, resm-i bâcları kānûn üzre aldıkdan sonra tevzî‘ olunagelmekle kānûn-ı kadîm ve elimde olan berât-ı âlişân mûcebince amel olunmak bâbında emr-i şerîf verilmek recâ ederim deyû bildirdiği ecilden kānûn üzre amel olunmak emrim olmuşdur. Buyurdum ki hükm-i şerîfim vardıkda husûs-ı mezbûre mukayyed olup göresin fi’l-hakīka kaziyye dediği gibi ise ol takdîrce kānûn-ı kadîm ve elinde olan berât-ı âlişânım mûcebince amel edip dahi vilâyet-i Rumeli’nde Vidin ve Boğdan ve Eflak câniblerinden gelen koyun mu‘tâd-ı kadîm üzre mahall-i mezbûrda ağıl olup ve kapı yapıp emîn ma‘rifetiyle ağıla konulup, kānûn ve defter mûcebince lâzım gelen resm-i bâcların mîrîsi için alındıkdan sonra tevzî‘ ettirilip kimesneye ta‘allül ve muhâlefet ettirmeyesin cânib-i mîrîye gadr ve zarar olmakdan ve olugelmişe muhâlif te‘addî ve tecâvüzden be gāyet ihtirâz eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’t-tâsi‘ ve’l-ışrîn min şehri Zilhicceti’ş-şerîfe sene 1072. Vasale ileynâ fî 19 min Zilhicceti’ş-şerîfe sene 1072. Bi-makāmı Kostantıniyye el-mahrûse.