Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 282 Hüküm no: 313 Orijinal metin no: [40a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in kötü halinden mahallelinin şikâyeti üzerine mahalleden çıkarılması Mahmiye-i İstanbul’da Hoca [Hayr]eddin mahallesi sükkânından Abdüllatîf Efendi b. Mehmed ve İmâm Mehmed Efendi b. İbrahim ve Hacı Mehmed b. Abdullah ve Hüseyin Çelebi b. Hasan ve Hacı Abdi b. Receb nâm kimesneler meclis-i şer‘-i şerîf-i enver ve mahfil-i dîn-i münîf-i ezherde yine mahalle-i mezkûre sükkânından Mehmed b. Mehmed nâm kimesne mahzarında her biri takrîr-i kelâm ve ta‘bîr ani’l-merâm edip mezbûr Mehmed şâribü’l-hamr ve bî-namaz olduğundan mâ‘adâ her gün sarhoş gelip ümm-i veledi olan Sertab nâm câriyesini darb-ı şedîd ile darb ve birkaç def‘a mezbûreyi bey‘ etmek için esir pazarına götürmüşdür el-hâsıl mezbûr Mehmed’in ef‘âl ve akvâlinden müte’ezzîleriz mahallemizden ihrâc olunması matlûbumuzdur deyû her biri mezbûr Mehmed’in sû-i hâlinden müte’ezzî ve müteşekkî olmağın def‘-i ezâ-yı müslimîn için mezbûr Mehmed mahalle-i mezbûreden ihrâc olunmak üzre mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, İbrahim Çelebi b. Mehmed, Gazanfer Bey b. Tevekkül, Mehmed b. Ramazan, Resul b. Rıdvan, İsmail Çelebi b. Mehmed.