Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 282 Hüküm no: 312 Orijinal metin no: [40a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Yasef’in, Nehime bt. Robin’i boşamasına rağmen evliliğe devam etmek isteğinin reddedildiği Havâss-ı aliyye müzâfâtından kasaba-i Hasköy’de Keçeci mahallesi sâkinelerinden Nehime bt. Robin nâm Yahudiye mahfil-i kazâda zevc-i sâbıkı İlya v. Yasef nâm Yahudi muvâcehesinde üzerine da‘vâ ve takrîr-i kelâm edip mezbûr İlya târih-i kitâbdan on sekiz gün mukaddem beni selâsen tatlîk eylemişken hâlâ yine benim ile zevciyyet mu‘âmelesi etmek murâd eder suâl olunup men‘ olunmak murâdımdır dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda udûl-i müslimînden olup yine mahalle-i mezbûre imâmı olan Abdurrahman Efendi b. Maksud ve Mustafa b. Yunus nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iyye-i mezbûre Nehime’yi zevc-i sâbıkı mezbûr İlya târih-i kitâbdan on sekiz gün mukaddem zikr olunan mahallede bizim huzûrumuzda selâsen tatlîk eyledi hâlâ mezbûre Nehime mezbûr İlya’dan selâsen mutallakadır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâmin aşer min Cumâdelâhire li sene seb‘a ve seb‘în ve elf. Şuhûdü’l-hâl: Ârif Mehmed Efendi b. Mehmed, Mustafa Beşe b. Receb, Ali Bey b. Muharrem, Mehmed Bey b. Ahmed, Veli Beşe b. Ahmed, Ahmed b. Mehmed, Şükrullah b. Mustafa, Abdi Çelebi b. Hüseyin.