Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 56 Hüküm no: 14 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Manol’ün İmroz’daki bağını Panayot v. İstirati’ye satması Vilâyet-i Rumeli’nde cezîre-i İmroz’dan olup hâlâ mahmiye-i İstanbul’da mütemekkin olan Panayot v. Manol nâm zimmî meclis-i şer‘de bâ‘isü’s-sifr diğer Panayot v. İstirati nâm zimmî muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkden cezîre-i mezbûrede vâki‘ Ayafoka nâm mevzi‘de bir tarafdan Kostantin [v.] Kolar bağı ve bir tarafdan Keretsi [v.] Zafir bağı ve bir tarafdan Milet nâm zimmî bağı ve bir tarafdan Yoluncuk bağı ile mahdûd tahmînen bir dönüm bir kıt‘a mülk bağımı bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık dört yüz fıddî nakd-i râyic fi’l-vakt akçeye mersûm diğer Panayot tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk, ol dahi ber minvâl-i muharrer iştirâ ve temellük ve kabûl edip semeni olan mezbûrü’n-na‘t dört bin akçeyi tamamen merkūm diğer Panayot yedinden alıp kabz edip bağ-ı mahdûd-ı mezkûru mahallinde zabt ve tasarrufa tarafımdan mersûm diğer Panayot’u taslît eyledim dedikde gıbbe’t-tasdîk mâ hüve’l-vâki‘ kayd şüd. Fi’l-yevmi’s-sâlis aşer min Muharremi’l-harâm sene 1073. Şuhûdü’l-hâl: Mehmed b. Mahmud, Hüseyin b. Bâli Abdullah eş-şehîr, Mehmed b. Mustafa, Hasan Muhzır, Mehmed Muhzır ve gayruhüm.