Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 56 Hüküm no: 15 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Matbah-ı âmire için cizye karşılığı bazı köylerden odun temin edilmesi Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki bundan akdem Matbah-ı âmirem mühimmâtı için ocaklık ta‘yîn olunan yerlerin odunu kifâyet eylemeyip ve rençberân tâifesinin İstanbul’a füruht eylemek için getirdikleri odun dahi mîrîye alınmağla bu bahâne ile cânib-i mîrîye ve sâir odun tâlibi olanlardan ziyâde müzâyaka olup def‘-i müzâyaka için Matbah-ı âmireme mahal ü münâsib olan yerlerden odun tedâriki ehemm-i mühimmeden olmağla kazâ-i mezbûra tâbi‘ Yorgadula ve Urgaz ve Torlu ve Istranca ve Yeniköy ve Fener karyeleri ve yine Hâslar defterine tâbi‘ nefs-i Midye ma‘a mahallât nâm karye keferesinin cizyeleri mukābelesinde mîrîye odun bağlanmak her vechile evlâ ve enfa‘ olmağla imdi zikr olunan karyelerden odun husûsuna vukūfu olan söz bilir içlerinden birkaç nefer re‘âyâyı mu‘accelen Dersa‘âdet’ime gönderesin ki cizyeleri mukābelesinde odunları kat‘ olunup ve karâr-dâde olup kimesneye zulm [ve] te‘addî olmaya deyû fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi te’hîr ve tevakkuf ettirmeyip zikr olunan karyeler re‘âyâsından odun husûsuna vukūfu olup içlerinden söz bilir kimesnelerden birkaç neferi Dersa‘âdet’ime gönderesin ki gelip tarafeynin rızâlarıyla cizye mukābelesinde odunları kat‘ olunup ve karâr-dâde bulup kimesneye zulm ve te‘addî olmak ihtimâli olmaya, şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî min Zilka‘deti’ş-şerîfe sene isneteyn ve seb‘în ve elf. Vasale ileynâ fi’l-yevmi’l-hâmis min Zilka‘deti’ş-şerîfe sene 1072. (…)