Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 63 Hüküm no: 25 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın menzillerde otağ kurması için gerekli malzemenin hazır edilmesi Çıra ve tokmak için Mefâhirü’l-kuzât ve’l-ekârim ma‘denü’l-fazl ve’l-e‘âlîm mahrûse-i Edirne’den İstanbul’a varınca yol üzerinde vâki‘ olan kadılar -zîde fezâiluhüm- tevkī‘-i refî‘-i hümâyûn vâsıl olıcak ma‘lûm ola ki hâlâ mahrûse-i Edirne’den südde-i sa‘âdetim tarafına teveccüh-i hümâyûnum mukarrer olmağla taht-ı kazânızda nüzûl olunacak menâzilin her birinde otağ-ı hümâyûnum için yüz vakıyye çıra seksen aded tokmak ve sekiz bin aded kazık iştirâ ve tedârik ve hâzır ve âmâde ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi te’hîr ve tevakkuf eylemeyip otağ-ı hümâyûnum için nüzûl olunacak menâzilin her birinde yüz vakıyye çıra ve seksen aded tokmak ve sekiz bin aded kazık iştirâ ve tedârik ve hâzır ve âmâde ettirip ihmâl ve müsâhele eylemeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâlis ve’l-ışrîn min Recebi’l-ferd sene isneteyn ve seb‘în ve elf. Edirne el-mahrûse. Vasale ileynâ fî 15 min Şa‘bâni’l-mu‘azzam sene 1072.