Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 63 Hüküm no: 24 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul etrafındaki mîrî çayırların biçilip taşınması Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki iftihârü’l-emâcid ve’l-ekârim bi’l-fi‘l Mirahor-ı evvel Mustafa -dâme mecduhû- Dersa‘âdet’ime mühürlü tezkire gönderip İstanbul etrâfında olan mîrî çayırların otu biçilip ve taşınıp der-anbâr olmak için arabacı ve digrenci ihrâc olmak lâzım olduğun bildirip emr-i şerîfimi recâ eylediği ecilden imdi kadîmden ola geldiği üzre vakit ve zamânıyla ihrâc ve itmâm-ı hizmeti ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre ahd edip târih-i mezbûre mahsûb olmak üzre mahall-i mezbûrda olan mîrî çayırların otu biçilip ve taşınıp der-anbâr olmak için kadîmî [ü]zre digrenci olan karyelerden ne mikdâr araba ve digren ta‘yîn olunmuş ise ma‘rifet-i şer‘le ale’l-esâmî defter eylediklerinden sonra vakt ve zamânıyla ihrâc ve mübâşir-i mezbûra karışıp defter mûcebince tamamen çayır emîni olanlara teslîm ettirip itmâm-ı hizmet ettiresin şöyle ki kadîmden mîrî çayır hizmeti edâ edegelen re‘âyâdan ba‘zıları mücerred çayır hizmeti edâ eyleme[me]k için ve köprücü ve ma‘denci ve derbendçi ve sâir tarîkle mu‘âflarız deyû illet ederlerse kat‘an ol vechile ta‘allül ve nizâ‘ ettirmeyip kānûn-ı kadîm üzre defter mûcebince edâ eylediği çayır hizmeti edâ ettiresin el-hâsıl çayır husûsu Istabl-ı âmiremin ziyâde ehemmindendir ki ana göre mukayyed olup avk ve te’hîrden ve ihmâl ve müsâheleden ve re‘âyâdan akçe alınmadan ve alâkası olmayanlara müdâhale olmasından be gāyet ihtirâz eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ ve’l-ışrîn sene isneteyn ve seb‘în ve elf. Der makām-ı Edirne el-mahrûse.