Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 71 Hüküm no: 33 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb Evkafı’na ait ihtisab vergisini toplama işinin Hacı Hüseyin Bey ve Musli Bey’e verilmesi Vech-i tahrîr-i hurûf oldur ki civâr-ı Kostantıniyye’de âsûde alemdâr-ı Resûl-i ekrem -sallallâhu te‘âlâ aleyhi ve sellem- olan Hazret-i Ebâ Eyyûb-i Ensârî -aleyhi’r-rahmetü’l-Bârî-’nin evkāf-ı şerîfelerinden kasaba-i mezbûrenin ihtisâbı vakf-ı şerîfe mahsûl kayd olunup senede otuz yedi bin akçeye olmağın işbu bin yetmiş iki senesi Şa‘bânü’l-mu‘azzamı gurresinden sene tamâmına değin zabt ve vakfa âid olan mahsûlâtı ahz ü kabz etmek üzre işbu bâ‘is-i temessük Hacı Hüseyin Bey ve Musli Bey nâm kimesneler ber vech-i iştirâke tâlibler olup mezbûrlara şehri mezbûr gurresinden sene tamâmına değin zabt etmek üzre tevliyyetim hasebiyle deruhde olunup kadîmden cânib-i şerîfe âid ve râci‘ hukūk ve rüsûma ahz ü kabz edip beher şehr yevmü’l-kıst hesâbı üzre maktû‘unu cânib-i vakf-ı şerîfe edâ ve teslîm eyleyip ve kasaba-i mezbûre tüccârları üzerine muhtesib ve zâbit bilip şer‘a muvâfık sözünden tecâvüz etmeyeler deyû işbu hurûf ketb olunup âhardan müdâhale olunmaya deyû yedlerine vaz‘ olundu. Tahrîren fî 28 [min] şehri Recebi’l-ferd sene 1072. Vasale ileynâ fî 29 şehri Recebi’l-ferd sene 1072. Bende Mehmed.