Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 284 Hüküm no: 315 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Muharrem’in pirinç satışı bedelinden Mehmed b. Ali’den alacaklı olduğu Tüccâr tâifesinden işbu bâ‘isü’l-kitâb Hasan b. Muharrem nâm kimesne meclis-i şer‘-i hatîrde Mehmed b. Ali nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde yedimden müşterâ ve makbûz keyli beynimizde ilm-i şer‘î ile ma‘lûm pirinç bahâsından seksen beş esedî guruş hakkım olup mukaddemâ meblağ-ı mezbûrun otuz beş esedî guruşunu yedinden ahz u kabz edip bâkī elli esedî guruşu zimmetinde kalıp hattâ meblağ-ı bâkī-i mezbûr elli esedî guruş vech-i muharrer üzre zimmetinde bana deyni olduğunu târih-i kitâbdan seksen gün mukaddem huzûr-ı müslimînde ikrâr dahi etmiş idi hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrda müdde‘âsını mübeyyine beyyine taleb olundukda udûl-i ricâl-i müslimînden olup mahmiye-i İstanbul’da Çakır Ağa mahallesinde müezzin olan Ahmed Halîfe b. Hüseyin ve Ördek Kasab mahallesi sükkânından Mehmed b. Hasan nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed târih-i kitâbdan sekiz gün mukaddem müdde‘î-i mezbûr Hasan’a beynimizde ma‘lûm pirinç bahâsından bâkī elli esedî guruş zimmetimde lâzımü’l-edâ deynim vardır huzûrumuzda ikrâr ve bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Abdi Çelebi b. Hüseyin, Baba Resul b. Rıdvan, Mehmed b. Ramazan