Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 284 Hüküm no: 316 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asvador v. Babek’in, ölen Ali b. Malkoç’taki alacağını oğlu Mustafa Beşe’den aldığının tespiti Keresteci tâifesinden işbu râfi‘ü’s-sifr Asvador v. Babek nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vilâyet-i Anadolu’da Eğin kazâsında Apçağa nâm karyede vefât eden Ali b. Malkoç’un sulbî kebîr oğlu Mustafa Beşe nâm kimesne mahzarında takrîr-i kelâm ve ta‘bîr ani’l-merâm edip müteveffâ-yı mezbûrun zimmetinde deyn-i şer‘îden hakkım olan yüz elli aded guruşumun elli guruşu târih-i kitâbdan üç sene mukaddem taleb ettiğimde ol dahi tasdîk edip bana altı bin hurda akçe vermiş iken hâlâ nâdim olup meblağ-ı mezkûr altı bin akçeyi benden taleb etmekle mu‘ârazadan hâlî değildir, suâl olunup mu‘ârazadan men‘ olunması matlûbumdur dedikde gıbbe’s-suâl mezbûr Mustafa Beşe kaziyye vech-i mübeyyen üzre olduğunu bi tav‘ihî ikrâr etmeğin vech-i muharrer üzre mu‘ârazadan men‘ olunup mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâbi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Abdi Çelebi b. Abdi, Yazıcı Mehmed Çelebi b. İsa, Mehmed Çelebi b. Şaban, Mehmed Çelebi b. Mehmed, Ramazan Beşe, Musli Beşe el-Mübâşir, Şükrullah Bey b. Mustafa ve gayruhüm.