Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 76 Hüküm no: 41 Orijinal metin no: [9b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın maiyeti ve davarları için menzil zahiresi temini Matlab İsti‘câl-i zehâyir Mefâhirü’l-kuzât ve’l-hükkâm ma‘denü’l-fazli ve’l-kelâm Edirne’den Âsitâne-i sa‘âdete varınca menâzil zahîresi ta‘yîn olunan yerlerin kadıları -zîde fazluhüm- ve mefâhirü’l-emâsil ve’l-akrân kethüdâ yerleri ve yeniçeri serdârları ve a‘yân-ı vilâyetin iş erleri -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki İnşâ’allâhü te‘âlâ devlet ve ikbâl ve sa‘âdet-i iclâl mahrûse-i Edirne’den Âsitâne-i sa‘âdetim tarafına teveccüh-i hümâyûnum mukarrer ve hareket-i hümâyûnum karîb olmağla taht-ı kazânızda iştirâ ve menâzile ihzârı fermânım olan zahîreyi mukaddemâ irsâl olunan emr-i şerîfim mûcebince mu‘accelen iştirâ ve tedârik ve İnşâ’allâhü te‘âlâ işbu mâh-ı Receb’in yirmi beşinci gününe değin menâzile hâzır ve âmâde ettirmeniz bâbında fermân-ı âlîşânım sâdır olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip taht-ı kazânızdan iştirâ ve menâzile ihzârı fermânım olan zahîreyi mukaddemâ irsâl olunan emr-i şerîfim mûcebince mu‘accelen iştirâ ve tedârik ve mâh-ı mezbûrun yirmi beşinci gününe değin ta‘yîn olunan menâzilde hâzır ve âmâde olmamağla -iyâzen billâhi te‘âlâ- müzâyakaya bâ‘is olasın, bir vechile özr ve cevâbın mesmû‘-ı hümâyûnum olmayıp her biriniz ziyâde ve ikāba müstahık olmanızı mukarrer bilesiz şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ ve’l-aşer min şehri Recebi’l-ferd li sene isneteyn ve seb‘în ve elf. Vasale ileynâ fi’l-yevmi’l-ışrîn min şehri Recebi’l-ferd sene 1072. Mahrûse-i Edirne.